Shillong, Naiwieng 15 :
Ka Hynñiewtrep Youths Council (HYC) hapoh ka jingïalam u President Seng Kmie u Bah Roy Kupar Synrem, mynta ka sngi Balang ka 15 tarik Naiwieng 2023, ka la leit ban buddien bad kylli na u Symbud Myntri Rangbah ka Jylla u Bah Prestone Tynsong, ïa ka shithi ba ka Ministry of Home Affairs (MHA) ka la pynphai biang sha ka sorkar Jylla ha kaba ïadei bad ka MRSS Amendment Bill 2020.
U Bah Roy Kupar Synrem haba kren sha ki lad pathai khubor u la ong, ba ka seng hadien ba ka la ïohi lyngba ki lad pathai khubor ba ka MHA ka la pynphai biang ka ka MRSS Amendment Bill, mynta ka sngi ka la wan ban buddien ha kaba ka la ïoh ban ïakren bad u Symbud Myntri Rangbah ka Jylla u Bah Prestone Tynsong.
U la ong ba katkum ka jingïathuh u Symbud Myntri Rangbah, ka MHA ka la pynphai biang sha ka sorkar ba kan peit bniah biang ïa katei ka Bill ba ka sorkar ka la mynjur hapoh ïing dorbar ha u snem 2020 ban pyntreikam hapoh ka jylla Meghalaya.
Une u nongïalam ba thymmai jong ka HYC u la ïathuh ba kadaw ba ka MHA ka la pynphai biang sha ka sorkar Jylla ka long ba kan peit bad khmih bha khnang ba ki aiñ jong ka sorkar Jylla kin ym don kano kano ka jingïatyngkhuh bad ki aiñ jong ka sorkar pdeng.
U la ïathuh ruh ba ka sorkar Jylla ha kine ki sngi ban wan kan sa khot ïa ki kynhun seng bhalang, ki seng saiñ pyrthei bad ki riew paw khmat sha ka jingïalang ban ïakren sani, ban peit bniah biang ïa kane ka Bill ïa kaba ka MHA ka la pynphai biang khnang ba yn lah ban ai ka jubab sha ka Sorkar Pdeng, ba ïa kane ka Bill yn lah ban pyntreikam hapoh ka Jylla.
Ka MRSS Amendment Bill 2020 kadei ka bill ba ka sorkar ka la mynjur ban pyntreikam hapoh ka jylla, ban khanglad ïa ka jingwan rung kyrthlep ki briew ba nabar hadien ba ki kynhun seng bhalang ki la pynlong ka jingïakhih ban dawa pyntreikam ïa ka ILP.
Hynrei kat haduh kane ka Bill ka dang sahkut ha kaban examin, ïa kaba ka sorkar pdeng kam pat ai ka jingmynjur ha kaba u Lat ka Jylla ruh um pat lah ban soi ban pynlong aiñ ïa ka.