Shillong, Nailur 06:
U Bah Hamletson dohling uba dei u nongai buit jong u Myntri rangbah ka jylla u Conrad K Sangma bad uba dei ruh u MLA barim ka Mylliem Konstitwensi, East Khasi Hills district u la ong ba ma u ryngkat ka seng NPP Mylliem Block ka pdiang sngewbha lada u bah RV Lyngdoh uba dei u MLA ba mynta jong ka seng Congress un rung sha ka seng NPP.
Kane ka jingpynpaw u bah Hamlet ka dei ha jingiakren bad ki nongthoh khubor hadien ka jingwanpyniasoh jong ki 3 ngut ki MLA na ka seng Congress sha ka Seng National People Party ka la wanrah shisha ia ka seng kaba skhem bad ruh kadei ka sien ka ba nyngkong ban ioh haduh 31 ngut ki MLA ban ialam syndon ia ka synshar ka khadar hapoh ka jylla.
Kine ki lai ngut ki MLA Congress kiba la wan pyniasoh ki long bah Charles Marngar na Mawhati, bah Gabriel Wahlang na Nongstoin bad Dr. Celestine Lyngdoh na Umsning.
Haba ki nongthoh khubor ki la banrap biang ia ki jingkylli, u bah Hamlet u la ong rba lada jia ba u bah Ronnie Lyngdoh ruh un rung sha ka NPP ka iing jong ka NPP kan pdiang sngewbha namar ka NPP ka dei ka seng kaba kylluit mynsiem bad haba ka pdiang ia kiba rung ym tang ba ka plie tang ia ka jingkhang hynrei kan plie naduh dohnud ia kiba kwah ban pyniasoh ban wan ia trei lang na ka bynta ka bit ka biang jong ka jylla hi baroh ka wei.
U la iathuh ong na ka liang ka seng NPP bad na poh konstitwensi ka la long kaba la pynkhreh na ka bynta ban ia khun ia ka ilekshon MDC lada kan wan ha kano kano ka por.
U la iathuh ruh ba napoh Mylliem Constitwensi kiba pan tiket ki la don haduh 6 ngut kiba kwah ia khun ha ka ilekshon MDC bad na ka liang ka kynhun NPP ka shem jynjar iano ban ai napdeng kine ki 6 ngut hynrei na ka liang ka ilekshon komite ka la dep ban ia shong haduh san sien bad ka la dep ban jied ia u wei na pdeng ki tei ki 6 ngut kiba pan tiket bad shen yn sa pynskhem noh ha kine ki khyndiat sngi .
Ha kaba ia dei bad ka jingiakhun na ka bynta ka ilekshon MDC ka ban sa wan u la ong ba u la rai ban nym ia khun ia ka ilekshon MDC amar u la dep kular ban ailad lang ia kiwei pat ki para samla hapoh ka konstitwensi namar hapoh mylliem kiba bun kiba la nang ka stad bad kiba la shemphang .