Shillong Naiwieng 14:
Ki nongniah kali kamai Laitumkhrah sha polo ki ba hap hapoh ka shatri jong ka Synjuk ki nongniah taxi sor bad khapsor mynta ka sngi ki la pynpaw biang ia ka jingeh halor ka jingpyniaid shi lynti lane one way na Polo sha Sawfurlong.
Kane ka jingphah ïaid shi lynti na Polo sha Sawfurlong ka la sdang naduh ka 6 tarik mynta u bnai Naiwieng 2023.”Kumba la pyntip ki bor pulit pyniaid kali, la ong ba kane ka dei tang ka jingpyrshang, bad kaba tang shi por, ban peit ia ka jingdheng kali hapoh ka sorry shillong”.
Ha ka jingïakren bad ki lad pathai khubor u bah Pynsuk Youroi, uba dei u General Secretary ka synjuk nongkamai kali sor bad khapsor, mynta ka 14 tarik u Naiwieng 2023, u la kyntu ia ki bor ba dei khmih ba kin peit ia kine ki jingeh, ym tang jong ki nongniah kali hynrei ia ki paidbah ruh kumjuh kiba shong kali namar ka jingeh, khamtam ia ki ba pang ba shitom.
U bah Youroi, u la pynpaw ba ka la don hi ka jingduna ha ka jingdheng kali ha ki bynta ha Sawfurlong sha polo namar ka jingphah ïaid one way, hynrei sha kiwei pat ki bynta, ka jingdheng kali ka dang don bad ka dang jur, bad ka buh jingeh ruh ia ki paidbah khamtam kiba pang ba shitom, namar ka lynti ïaid ka la jngai bad kyllaiñ.
“Na ka liang ka kynhun ka la kyntu ia ki bor pulit ba ki dei ban peit ba kan don ka jingpyniabiang sha baroh ki bynta jong ka sor ban lait na ka jingdheng kali, ym tang ha ki bynta jong ka polo”, la bynrap u bah Pynsuk.