Shillong, Kyllalyngkot 08: Ka seng Hynniewtrep National Liberation Council (HNLC) ka la phah ia ka shithi sha ka Sorkar ban pyntip ba kan pynkut weng noh ialade na ka jingiakren iasuk.
Katkum ka jingïathuh u Bah Sadon K Blah uba dei u ksiang ka HNLC sha ka miej ïakren ïasuk ba ia katei ka shithi la aiti ha u ksiang bala thung da ka Sorkar jylla u Bah PS Dkhar.
U Bah Sadon K Blah haba kren sha ki lad pathai khubor mynta ka sngi Nyngkong ka 8 tarik Kyllalyngkot 2024 u la ong kynnoh ba ka jingweng jong ka HNLC ia ka jingïakren kadei na kadaw ba ka sorkar kam shym la sngap ia ki mat jingdawa jong ka seng kaba la wan haduh tyngkong ban ïakren ïasuk.
Ha kajuh ka por u la kyntu ia ka sorkar ba kadei ban sngap ia ka jingdawa jong ka seng HNLC khnang ba ka jingïakren iasuk kan long kaba jop.Shuh shuh u Bah Sadon K Blah u la ong ba ki kham eh ki case jong ka jingïakhih ki saw seng bhalang ban ia ki case jong ka seng HNLC.
“Ki kham eh ki case jong ki jingïakhih ki saw seng bhalang hynrei dang ka sorkar ka dang lah ban weng ïa ki (HNLC) pat balei ym lah. Ka sorkar kadei ban weng lut khnang ba ka jingïakren iasuk kan long kaba jop,” ong u Bah Sadon K Blah.
Kum ban pynkynmaw hangne ba ha ka 3 tarik Kyllalyngkot, ka HNLC kala pynbna ia ka rai ban weng noh ialade na ka jingiakren iasuk kum ka dak ban pyrshah ia ka jingkynnoh khein sting ka Sorkar ban leh eiei halor ki 5 tylli ki mat jingdawa ba kongsan tam ka seng ba kynthup ia ka jingmap noh ia ki kam bymman baroh.
Ha ka kyrwoh, u General Secretary ka HNLC cum Publicity Secretary u Bah Sainkupar Nongtraw ula ong ba ka jingthmu jong ka jingphah ktien ka long ban pynbna ia ka rai jong ka HNLC ba kan weng noh ialade na ka miej jingiakren iasuk.
Ia kane ka rai la shim kum ka jubab ia ka jingkhein sting ka Sorkar ban leh eiei halor ki mat jingdawa jong ka seng.