Shillong, Nailar 22:
Ki paidbah ki la ioh ban shad da ka jingkmen khlem jingsangeh haba ka Shillong Lajong FC ka la ioh ban rung sha ka Semi Final hadien b aka la lah ban pynliem ia ka East Bengal kaba dei ka team kaba don ha Indian Super League da 2-1 ha jingialehkai Quarter Final Durand Cup kaba la long mynta ka sngi Balang ha ka por 7:00 baje janmiet ha madan JN Stadium Polo, Shillong.
Katkum ka jingpynbna ha madan, ki paidbah kiba la poi ha ki jaka shong katkum ka tiket ba la dep die ka poi palat 14,900 ngut kiba la wan sakhi ia kane ka jingialehkai ha JN Stadium Polo.
Haba phai ha kane ka jingialehkai ka la pynkyndeh mynsiem ia ki nongkyrshan ka Shillong Lajong namar mar shu sdang ka jingialehkai kata ha ka por 7 minit 44 second u rangialehkai na Lajong u Rudwere u la ioh ban thep ia ka kol kaba nyngkong.
Hadien katto katne minit mar shu sdang s aka kyllamiet ka East Bengal ka la ioh ban pynphai ia ka kol ha ka por 76 minit ba la thep da u Nandha. Kaba la pynkmen ia ki paidbah ka dei hashwa ba u refree un pynwai noh ia ka jingialehkai ka Shillong Lajong ka la ioh ban pynphai da kaba thep da ha ka minit kaba 84 da u Figo.
Ha kane ka jingialehkai la iohi ba ki paidbah kiba wan na nongkyndong ki bun kiba la leitphai thylli namar ka jingbym don tiket shuh naduh dangstep namar ba la bun kiba la dep thied lut na Online.
Namar ka tiket kam don shuh kito kiba la shim kham bun ka tiket ki don kiba la die T.200 ia ka tiket kaba T.100 katba ia ka tiket kaba T.200 ki die T.500 hynrei hashwa b aka pork an dei ban sdang noh ki la don kiba tyrwa T.1000 ia ka tiket kaba T.1000 hynrei kito kiba la wan najngai kiba tang khyndiat ngut ki la thied beit tang ban ioh peitkai hynrei kito kiba la wan bun ngut ki khlem thied shuh.
Kane ka jingshad kmen ki paidbah hadien b aka Shillong Lajong ka rung sha Semi final ka dei ka sien kaba nyngkong b aka team na Shillong kan ioh rung Semi Final ha ka jingialehkai Durand Cup kaba dei ka jingialehkai kaba rim tam ha India.