Shillong 30 Iaiong:
Ia kamet ba dangsah jong i kong Aryona Rapsang ba ju khot ieit ruh i kong Lit-Lit, la tep donburom mynta ka sngi balang ka 30 Tarik u Iaiong 2025 ha u lum jingtep ka balang u Khris Mawlai Nonglum.
Hashwa ban leit ontep ia i kong Aryona la pyndep ia ka jinglehburom khatduh ha iingsah ka ba don ha Mawlai Nonglum, ba la pyniaid da i bah Evangelist Saidingstar Warjri, ha ka jingiadonlang ki khun ki kti, ki bahaiing hasem, ki marjan marpa bad ruh ki ba la wan sngewlem.
I kong Aryona Rapsang ila khlad noh na ka sla pyrthei myn ha ka 28 tarik mynta u bnai Iaiong 2025, ha iingsah. Ha kajuh kapor ruh i kong Aryona Rapsang idei i President ka youth Wing jong ka seng UHM i ba la trei shitrhem na ka bynta ka jaitbynriew mynba i dangdon ha ka sla pyrthei.I kong Aryona Rapsang i la khladnoh ha ka karta ba 54 snem bad i la ieh noh shadien ia 4 ngut I khun.
Ha kane ka sngi La ioh ka jingkren lyngkot na u president rangbah ka UHM u samla Charles Rani ha kaba u la iathuh katto kattne shaphang i kong Aryona Rapsang iba ka trei na ka bynta ka eh ka shon ka jaitbynriew mynba i dang don ha kamet ka ba shait ba khlaiñ.
U la ong ruh, ba ha kapor bajur ka khlam Covid-19 i kong Aryona Rapsang im ju shongthaid, im shem riej bad sheptieng , hynrei i la leit lang beit bad ki nongialam ka CEC ban nohjingiarap sha ki ba bun ki nongshong shnong.
Ha ki jingiakhih jong ka seng i kong Aryona Rapsang idei iwei i nongialam ba shitrhem bha,la ong u bah Charles.Kumta u bah Charles u la phah ka jingsngewlem sha ki khun ki kti jong i kong Aryona bad ruh sha ki bahaiing hasem ha kaba kum kane ka jingsngewsih jong ka jingkhlad noh jong i bad ruh da kaba ong, ban iai don ryngkat bad ka iing ka sem.
La ioh ruh ka jingkren Na ka liang ka iing Kasem, ha kaba ki la iathuh, ba i kong Aryona i la shitom mynta la kumba arsnem eiei bad ki la phah sumar ha Nongbah Shillong bad ruh sha Guwahati, hynrei namar ka jingban ka jingpang im shem la ioh kamet ka ba khlain bha haduh ba in da khlad noh na ka sla pyrthei.
Ki la iathuh ruh, ba i kong Aryona ha kapor ba i shitom l, i la bthah lypa ia ki khun ba kin pyntem ia ka jingrwai ka ba i sngewshem mynsiem eh. Shuh shuh ki la iathuh ruh, ba i kong Aryona ha kapor ba i shitom i la ong ia ki khun, ba kimdei ban sahnut ia i, namar ha ki bynta baroh ngi la ioh ka jingshakri kylluit ha u Blei.
Haba pynkut ia ka jingkren Na ka liang ka iing ka sem ki la ai khublei ia baroh ki ba la noh synnniag, ia i kong Aryona ha kapor ba i shitom, ki ba la wan ban pynlong jingduwai, la kalong na ka Balang bad na ki ba wan sngewlem ruh kumjuh bad kumjuh ruh sha baroh ki paidbah nongshong shnong ki ba la noh ka kti kamon kti kadiang ban sngewlem ia i.
