U Myntri Rangbah ka Manipur, u N Biren Singh, u la iehnoh kam mynta ka sngi- ar snem hadien ba la mih ka jingiakynad hapdeng ki jaidbynriew ha katei ka Jylla — ban pynjem ia ka jingpyrshah ha ka seng BJP jong ka Jylla, pyrshah ia ka jinglong nongialam jongu, namar ba ka sorkar jongu, ka iakynduh ia ka jingma jong ka jing pyrshah jong ka seng Congress bad ka jing tynjuh ia ka mala.
U Myntri Rangbah ka Jylla ula aiti ia ka jingiehnoh kam jong u sha u Lat ka jylla mynta ka janmiet.
Katba ka BJP ka don ia ki nombar watla ka la weng noh ia ka jingkyrshan da ka National Peoples’ Party jong u Conrad Sangma, ka la don ka jingma ba ki MLA kiba wad ia ka jingkylla ha ka jinglong nongialam, kin jin da la leh khlem akor ia ka party whip lada jia ba ka don ka floor test.
Ban lait na kata ka jingma, u Myntri Rangbah ka Jylla u la hiar shuki hadien ba u la ïakren bad ki nongïalam ka Pdeng.
U Singh u la leit sha Delhi mynta ka step ha kaba u la iakynduh ia u heh ka party u JP Nadda bad ia u heh duh jong ka party, u myntri ka sorkar pdeng u Amit Shah.
Da kaba kdew ia ka jingiakynad hapdeng ki jaitbynriew kaba la jia ha u bnai Jymmang 2023, ki MLA kiba 12 ngut ki la pynbor jur ban pynkylla ia ka jinglong nongialam, bad ki don haduh hynriew ngut ki nongap kynroh, la iathuh ki tyllong khubor jong ka seng. Ki tyllong khubor ki la bynrap ruh ba u Lamphang bad u myntri rangbah ki la don ka “jingiapher jingmut”.
Don napdeng ki MLA BJP kiba la iakynduh wat ia u Amit Shah da ki jingdawa jong ki.
Da ka jingbyrngem jong ka Congress ban wanrah ia ka jingbym shaniah shuh ha ka dorbar thawain kaba sdang lashai ka sngi, ki tyllong khubor ki la iathuh ba ka don ka jingma ba kin lyndet ia ka jingleh test ha ka mala.
Ki tyllong khubor ki la iathuh ruh ba ka BJP, haba khein ia ka jingjop jong ka ha ka elekshon sha ka iing dorbar thawain jong ka Maharashtra, Haryana bad Delhi, kam kwah ia ka jingeh kaba lah ban tap lup ia ka jingiathuhkhana sain pyrthei kaba bha.
Ka jingkren pyrshah ia u Biren Singh ka la nangjur shuh shuh hadien ba uwei u briew na ka jaidbynriew Kuki u la leit sha ka Supreme Court da kaba kynnoh ba u Myntri Rangbah ka Jylla u la pynmih ia ka jingkulmar ha kane ka jylla. Ka jingujor jong u ka long halor ki audio tape kiba la bthei kiba la kynnoh ba ki dei jong u Myntri Rangbah ka Jylla.