Naiwieng Naiwieng 20
Hadien ba la mih ka jingjia shah tynrah thuk thuk ia kawei ka longkmie ha surok bah Mawlai Mawdatbaki, haduh ba kane ka longkmie ka la khlad noh, mynta ka sngi nyngkong ka 20 tarik u u Naiwieng 2023, la iohi ba u wei u speed breaker u la mih kynsan ha kane ka jaka.
Katei ka jaka kadei ka jaka ha kaba baroh ki paidbah ki la iohi ia kawei ka video ka ba la saphriang ha ki rynsan social media ha ka 13 tarik u naiwieng 2023 ba kawei ka longkmie katba ka dang thmu ban kam sha shiliang ka surok ka la shah tynrah ha kawei ka arshaka ha kaba ka la khlad noh.
Ka jingdon jong u tei u speed breaker ka long ban tehlakam ia ka jingpynher sted ki kali khamtam ki ba niah arshaka ka ba buh jingma ia ka iaid ka ieng jong ki paidbah ki ba iaid lynti.
Ha ka jingiakren bad u Secretary ka dorbar shnong mawlai mawdatbaki u bah L.S.Lyngdoh mynta ka sngi nyngkong u la iathuh, ba u ia une u speed breaker la shna ha ka miet jong ka sngi saitjaiñ ka 18 tarik naiwieng 2023,hadien ba nakaliang ka dorbar shnong ka la leit ban iakynduh ia u symbud myntri rangbah ka jylla u bah Prestone Tynsong ban kyrpad ban leh eiei noh nakabynta katei ka jaka khnnang ban lait na ki jingmynsaw.
Ki Rangbah jong ka snong mawlai mawdatbaki ki la leit ban iakynduh ia u bah Prestone myn ha ka 16 tarik u naiwieng 2023,ban dawa na u, ba u dei ban shimkhia ia ka jingdon ki ba ñiah khlem akor ia ki kali bas ki arahaka.
U bah L S. Lyngdoh u la ong, ba hadien ba ki la wan iakynduh ia u symbud myntri, nakaliang ki pulit pyniaid kali ha ka miet jong ka 18 tarik ki la wan ban buh ia u speed breaker ha kane ka jaka khnang ban tehlakam ia ki briew ba iaid khlemakor ia ki arshaka bad kali.
“Ka shnong mawlai mawdatbaki lyngba u bah L S. Lyngdoh u ba dei u secretary, ka la ai khublei ia symbud myntri ka jylla u bah Prestone Tynsong, bad ki pulit ba pyniaid kali, ba ki la shimkhia ia kane ka mad jingdawa jong ka shnong” u la ong.
Nakaliang u bah L S. Lyngdoh u la kyntu ruh ia ki bor ba dei peit ban pynkhlaiñ ia ka aiñ ban pyrkhiang bha ha kaba iadei bad ka jingioh license jong ki khynnah ki bym pat kot sha ka 18 snem karta, ki ba la ioh lad ban ñiah ia ki kali bad ki arshaka ha ki surok.
Shuh shuh u la ong, ba khamtam eh ia ki kmie ki kpa ba kidei ban phikir bha ia la ki khun jongki, ban ym ailad ba ki khun kin ñiah ia ki arshaka bad ki kali haba ka karta kam pat dei, khnang ban lait na ki jingmynsaw ia ki ba leit ba wan.
