Shillong, Jylliew 22:
U Myntri ka tnad shangkai pyrthei jong ka sorkar jylla uba dei u MLA ka UDP na West Shillong constituency bah Paul Lyngdoh u la pynkynmaw ba hadien ki phareng ki la mih na ri India ha u snem 1947, ki nongsynshar ka ri Khasi ki la shong pyrkhat ban don ha India ne ha East Pakistan kaba mynta ki khot ka Bangladesh hynrei ha kaba khatduh ki la rai ban don ha India.
Ia kine ki kyntien u la pynkynmaw haba u bah Paul Lyngdoh u la kren kum u kongsan hadien ba u la plie pyrda ia ka Nurthlong Park kaba don ha Thangkarang kaba hap ha Mawsmai Nongthymmai Elaka kaba hap ruh ha Shella Constituency, East Khasi Hills District kaba la long mynta ka sngi Thohdieng.
Ha kane ka sngi la iadonlang u MLA ka Shella constituency bah Balajied Synrem, bah Titos Chyne u MDC ka Sohra constituency, u sirdar ka Mawsmai Nongthymmai Elaka bah Kenesing Khongwar, ki nongialam shnong, ki ophisar ka tnad shangkai pyrthei, ki longkmie longkpa bad la pynshngain ia ka jingialang da ka jingrwai ki samla na katei ka Elaka.
Haba ai jingkren kum u kongsan, u bah Paul Lyngdoh u la ong ba aiu kan jia lada ka ri Khasi kan hap lang ha Bangladesh hynrei da ka jingialam bastad uba najrong ka Bangladesh ka la ioh la ka jong n aka jingsynshar ka Pakistan.
“Nga kynmaw haba u don uwei u pulit S.I. u wan ban pan jingiarap ban pynkynriahkam na Sohra sha Shillong hangta nga la iathuhkhana ia u Thomas Jones bad ka lok ki wan an Wales ki iaid lyngba ka Bay of Bengal ban poi sha Sohra khlem sngewthuh ia ka ktien ka thylliej hynrei balei ngi pat ngi kwah ban sah ha Shillong” u la ong.
U la pynkynmaw ha ka por b aka wan ka MCCL, la wan khot na iing ia imei hynrei ha kane ka juk mynta haba la khang ia ka MCCL hynrei ki briew ka thain Sohra ki khlem iap thngan namar ka don sa kawei ka kam ban trei kata ka kam jngohkai pyrthei.
Shuh shuh u la ong b aka sorkar MDA ka buh ia ka thong ba hapoh san snem ki briew kane ka thain kin im jakpoh palat 90 percent da ka jingwan ki nongjngohkai pyrthei.
Ha kajuh ka por u la pyntip ba hapoh ka private public partnership, ka sorkar ka la dep shna ia ka Detail Project Reort ban pan pisa sha ka sorkar India ban pynitynnad ia ki jaka jngohkai pyrthei ha Sohra kaba la mang haduh 210 klur tyngka.
