U Tymmenbasan Krelstone Lartang (83 snem ka rta) u la khlad noh na kane ka sla pyrthei ha ka 24 tarik mynta ubnai Risaw 2023 ha iingsah jong u ha Mawpdai, Mawsynram Block, East khasi Hills District hadien 53 snem ba u la shakri ia ka Balang Presbyterian Mawpdai kum u rangbah balang ha ka kyrdan Tymmenbasan kaba hap hapoh ka Mawphlang Presbytery.U Tymmenbasan Krelstone Lartang u dei u khun jong u R Marngar bad ka Pre Lartang u don san ngut shipara, 4 ngut ki shynrang bad kawei ka kynthei u la heh la san ha shnong Pyndensohsaw hynrei ba u la poikha sha Mawpdai u la long noh kum u nongshong shnong ba pura jong ka Mawpdai.Ha u snem 1970 ki riew dkhot jong ka Balang Presbyterian Mawpdai ki la ibit ia u ban long kum u Tymmenbasan bad la pynskhem ia u ha ka por ba ka Mawphlang- Rangthong ki dang long kawei ka presbytery.Ha ka jinglong Tymmenbasan u Krelstone u la long ruh u Moderator jong ka Mawphlang Presbytery bad u la long shisha u nongialam jong ka Balang ban pynkylla bamut ia shibun ki mynsiem kiba la sakma na ka Balang.Ha ka jinglong tymmen, u Tymmenbasan Krelstone u la khlad noh na ka pyrthei na ka jingkyllon ha madan ha ka 24 tarik Risaw 2023 bad u trai u la shim noh ia u shalade hi.Kumta kiba haiing hasem, ki khun ki kti, ka Balang Mawpdai, ka District war sepngi bad ka Presbytery Mawphlang ki la pynlong ia ka jinglehniam khatduh ha ka 26 tarik Risaw 2023 da kaba sdang nyngkong ha phyllaw iing, hadien kata ki nongkitkam ka District ki la rah ia ka synduk na phyllaw shaduh ka phyllaw ïingmane bad na phyllaw ïingmane la rah da ki nongkitkam ka Mawphlang Presbytery, kumjuh ruh na phyllaw ïingmane la rah noh da kiba haiing hasem shaduh u Lum jingtep ka Balang Presbyterian Mawpdai.