Ngi ioh tang 2 sngi ban pynkhreh ia ka Durand Dup,ki khynnah ki la lehkai bha pyrshah ia ka FC Goa: Aibor
Shillong, Nailar 08:
U Bah Aibor Khongjee uba dei u rangialehkai uba paw hapoh ka jylla uba la long mynta kum u Coach ka Rangdajied FC u la pynpaw ba watla ka Rangdajied FC ka la ioh por tang ar sngi ban pynkhreh ia ka jingialehkai phutbol Durand Cup 2024 pyrshah ia ka FC Goa hynrei ki rangialehkai ki la lah ban ialehkai bha kaba la long myn ha ka 5 tarik mynta u bnai Nailar ha madan JN Stadium, Polo Shillong.
U la iathuh ba hadien ba kawei na ki kynhun kiba don ha ka group-F kata ka Hyderabad FC ka la kynrandien noh, u trai jong ka Rangdajied FC bah Eugeneson Lyngdoh u la pyntip sha u ba ka don ka jingtyrwa na ka AIFF ban iashimbynta ha kane ka durand Cup.
“Nga la pan por tang katto katne minit na u bah Eugene ban pyntip sha ki rangialehkai hynrei da ka jingkmen baroh ki la kwah iashimbynta bad mar kumta ngi la ai ktien sha ki bor pyniaid ban iakhun beit ia kane ka Durand cup watla ha ka por ba lyngkot” u la ong.
U la pynshai ba kane ka jingiashimbynta wat ha ka por ba lyngkot ka long ka kabu ksiar ia ka Rangdajied namar kan plie ia ka lad ia ki samla ba kin ialehkai bad ki kynhun kiba heh ha india namar ka Durand Cup ka dei ka lympung ialehkai kaba rim ha India.
U la pyntip ba ka Rangdajied kan sa ialehkai bha haba kan iakynduh bad ka Shillong Lajong FC ka ban long ha ka 10 tarik mynta u bnai.
Haba phai ha ka jingshah rem ha ka FC Goa ka don ka jingbakla ha ka minit kaba khatduh ba la shah pynphai hynrei u sngewtynnad haba ki rangialehkai ki la leh bha ha madan.
“Ka jingslap ka dei ka jingkyrkhu ia ngi namar ka ai mynsiem ia ki rangialehkai haba ngi duba bormet bad ka jingjrong” u la ong.
U la phla ba ki nongkyrshan ki kham bun ki dei jong ka Shillong Lajong hynrei u don jingkyrmen ba ki paidbah kin sa ai jingkyrshan ia ka kynhun Rangdajied haba kin iakynduh ha ka sngi Saitjain hynrei ki paidbah ki kham kyrshan bha ia ki rangialehkai kiba lehkai bha ha madan.
U bah Aibor Khongjee u la shimti kum u Coach ka Rangdajied FC ha u snem 2020-21 bad u don ka thong ba ka kynhun kan ioh rung sha ka jingialehkai phutbol I-League.
Kumban shu pynkynmaw ka Rangdajied FC ka la shah rem da 3 kol la 4 kol ha ka FC Goa hapdeng ka jingialehkai kaba jur u slap.
Haba ioh ban iakren bad u rangialehkai hapdeng u Pynbhalang Suting, uba ka shnong trai ka dei na Wahlakhiat, Mawkynrew block u la pynpaw ba ka jingioh ban thep ia ka kol ka jong u ka dei ha ka por ba 61 minit haba la ai da u paralok.
U la ong ba hapdeng ka jingiakhun kaba jwat bha haba la ioh mar lai kol ka FC Goa kaba bhabok ka la ioh ban thep sa kawei ka kol ban jop syndon.
“Watla ngi la pynkhreh tang ar sngi hynrei nga sngewkmen ba nga la ioh ban ialehkai ha ka Durand Cup” u la ong.
U la pynpaw ba watla ki khasi ki kham lyngkot hynrei haba mih ha madan kim ju tieng lada u jrong ne uba heh met hynrei hap ban iakhun beit ban ioh thep kol.
