Shillong, Kyllalyngkot 26:
Watla ka Congress ka la iatreilang bad ka NPP ha Khasi Hills Autonomous District Council (KHADC) hynrei u nongialam ka Congress bah Pynshngain N Syiem uba dei ruh u symbud CEM ka KHADC u la ong ba ka shong beit ha ka mon laitluid ki MDC ban phet na kawei ka seng sha kawei pat.
Kane ka jingiakren bad u bah Pynshngain N Syiem ka dei hadien ba u MDC ka Congress na Mairang constituency bah Batskhem Ryntathiang u la leit ban pyniasoh pura sha ka seng NPP ha Mairang ha kaba la pdiang burom da ka kyrtong MP Lok sabha ka NPP ka kong Ampareen Lyngdoh ha ka jingiadonlang ki nongkitkam ka NPP na Shillong.
Da ka jingphet seng noh u MDC ka Congress na Mairang constituency kaba hap ha Eastern West khasi Hills District ki MDC ka Congress ha KHADC ki sah satang san ngut kata kynthup ia u bah RV Lyngdoh, bah PN Syiem, bah Gabriel Wahlang, bah Charles Marngar bad bah Carnes Sohshang.
Haba iakren bad u bah Pynshngain Syiem u la iathuh ba u bah Batskhem haba u phet na ka seng Congress u khlem pyntip sha u hynrei ioh lehse u la pyntip sha u President ka MPCC bah Vincent H Pala.
Haba kylli kumno u sngew haba ka NPP ka tan noh ia u MDC ka Congress haba ki iatreilang ha Executive Committee, u bah Pynshngain u la ong ba um lah ban batai ia kiwei ki seng sainpyrthei namar ka shong beit ha ka mon laitluid u MDC lada u kwah ban phet.
U la ong ba lada ka NPP ka tan jubor kan nym lah lada u MDC um don ia ka mon laitluid.
Shuh shuh haba kylli kan ktah ne em ia ka seng Congress haba pynkhreh ia ka ilekshon MP Lok Sabha, u bah Pynshngain u la ong biang ba ia kane um lah ban batai namar ka dei beit ka mon laitluid ki MDC.
U don jingkyrmen ba ki MDC kiba sah mynta sa san ngut kin long kiba skhem.
Kumban shu pynkynmaw u bah Batskhem Ryntathiang u la dep phet teng na ka seng Congress ban rung sha ka HSPDP hynrei hadien katto katne por u la wanphai biang bad iakhun ia ka ilekshon MLA hynrei u la shah rem noh tang khyndiat vote ha u MLA ba mynta bah Metbah Lyngdoh uba dei u President ka UDP.