Shillong, Naitung 19:
U Bah Nicholas Chyrmang uba dei u secretary ka Khasi Student Union (KSU) Delhi Unit u don shisha ka mynsiem ban thrang ban pynpaw nam ia ki jingbam khasi ha nongbah Delhi.
Ha ka jingiakynduh bad U Nongsain Hima ha nongbah Delhi, u bah Nicholas u la iathuh ba haduh mynta ym pat don ka dukan ban shet da ki jingbam khasi dei na kane ka daw ba ki briew kim da tip than ia ka jingbam khasi bad garo lada ianujor bad kiwe ki jylla ka thain shatei lammihngi.
U la iathuh ba mynta u la sdang ban shet jingbam khasi da kaba leh online bad kino kino kiba poi sha Delhi ki lah ban call ia u.
U la iathuh ruh ba ki jingbam khasi kaba u la shet ha Delhi ki long Jadoh, dohkhleh, pu khlein, putharo, ricecake bad kiwei de.
Shuh shuh u la iathuh ba u la sah sha Delhi ka la iaid mynta 10 snem hadien ba u la pyndep ia ka jingpule na Shillong.
U la pyntip haba u wan sha Delhi u ioh ban trei nyngkong ha ka ‘call centre’ hadien kata u la trei kum u medical tourist ban iarap ia ki briew na kiwei ki ri haba ki wan ban shim dawai na ki doktor ha Delhi bad mynta u la sdang noh da ka kam lajong ban die jingbam khasi.
U bah Nicholas u la kyntu ia ki samla haba ki mih na jylla ki dei ban da pyntip ia kiba haiing, ha shnong khnang ban lait n aka jingshah thok ha ki briew haba ki wan sha Delhi.
U bah Nicholas u la ioh ban pyni ia ki jingbam khasi ha ka por ba u wan die ha iew die sohtrun ha Dili Hat, Delhi.