Shillong, Naiwieng 23: Ka Seng Khasi SengKmie hynne ka sngi palei ka 23 tarik u naiwieng 2023, ka la rakhe ia ka lynkhuh dap 124 snem jong ka Seng Kut Snem, bala seng naka bynta ban iada bad pynneh iaka jinglong kyrpang ki Khasi hapoh ka Jylla.
Kia la sdang ia kane ka jingiaid pyni riti na madan iewrenghep bad hadien kane la pynlong ka jingiaid paidbah shaduh Madan Weiking da ki khun ki hajar.
Ia kane ka sngi la sdang da ka nguh ka dem blei ha madan iewranghep, Laitumkhrah bad hadien kane ki la pynlong ia ka shad bad but pat da ka jingiaid paidbah ryngkat ka put ka tem, ki jingrwai pynneh pynsah iaka riti dustur u khun khasi na madan iewranghep shaduh madan Weiking.
Ha kane ka sngi rakhe dap 124 snem ka Seng Khasi la wan shim bynta lang da u Cjhief Executive Member (CEM) ka Khasi Hills Autonomous District Council (KHADC) u Bah Pyniaid Sing Syiem, u Syiem ka Hima Khyriem u Paiem Balajied Sing Syiem, u Siem ka Hima Hima Mylliem u Paiem Ainam Manik Syiem, u President ka Seng Khasi Kmie u Rgh Oplysor Pyngrope lem bad kiwei ki nongkitkam ka Seng Khasi, ka Kong Matsiewdor War Nongbri nalor kiwei kiwei de.
Lah ban kdew ba haka 23 tarik Naiwieng 1899, 16 ngut ki rangbah kila ieng rasong ban seng iaka Khasi Young Men’s Association daka jingthmu ban ialeh katba lah ban iada bad ban pynneh pynsah iaka jinglong kyrpang ki Khasi bad haka juh ka por ban iada naka jingshah tyllep ka Niam Trai Niam Tre haki bor synshar ka Sorkar phareng.
Hadien bala seng iaka Khasi Young Men’s Association, la rakhe iaka 23 tarik Naiwieng man u snem kum ka Seng Kut Snem hynrei dei tad hadien 1901 la pynkylla iaka Khasi Young Men’s Association Seng Khasi.
Haba kren sha ki lad pathai khubor u Assistance General Secretary ka Seng Khasi Sengkmie U Rgh Paia B Synrem ula ong ba kane ka jingrakhe iaka Seng Kut Snem kadei ruh ban ai nguh ia u Blei uba la kyrkhu iaki khun ki hajar lyngba ka jingbha ka kamai ka kajih.U Rgh Paia B Synrem ula iathuh baka seng ka dap daka jingkmen namar, kala ioh ka jaka kaba heh kumba 6 akar ka jaka ha New Shillong bad kane kan nang iarap iaka seng ban pyniar iaka jingialap haba iadei bad ka jingialeh ban iada bad pynneh iaka jinglong kyrpang ki Khasi.
