Shillong, Jymmang 17:
Ka jingshna ia ka surok na Shillong sha Pynursla ban poi sha Dawki ka la iaid shait shait namar la iohi ba ka company ba pyntrei ia ka surok ka la sdang ban tih nongrim ia ka riat ban pynieng paia ban shna ia ka jingkieng thymmai ha wah umngot kaba don haneng ka shnong Dawki.
Ka jingshna ia ka surok na Shillong sha Dawki lyngba ka Pynursla ka la iaid mynta la katto katne snem hynrei kaba dang kham slem ka dei beit ha riat rngain shwa ban poi sha Pynursla namar ki bun palat ki riat kiba jylliew.
Ha ka jingjurip u nonglum khubor la iohi ba ka company kaba shna ia kane ka surok la sdang ban siangrong ha ki jaka ba long madan naduh Hynniewmer haduh riat rngain hynrei don ki bynta kum ha Umtyngngar ka company ka dang dih ia u lum ban pynmadan.
Shuh shuh don ki jaka ba long madan ha riat rngain ka company ka la dep siangrong hynrei mar shu sdang na lad shnong Mawkhap ka Company ka dang sdang tih ia u lum ban pynheh ia ka surok.
La iohi haba ki JCB ki dang tih ia u lum la hap ban pynsangeh baroh ar liang ki kali kiba kiew bad kiba hiar khnang ban nym don ka jingmynsaw ha ka por ba ki iaid.
Nangta ia kane ka surok thymmai la iaid kiar noh na Wahkdait ban iaid narud shnong ban poi sha Umsyiem ban shna syndon ia ka jingkieng thymmai ban poi pyrshah ia ka Dawki PHC.
Kane ka jingkieng thymmai kan kham jrong bad kan kham jylliew namar yn shna kham shaneng ia ka jingkieng kaba rim kaba iaid mynta kaba don ha ka wah Umngot.
La iohi ruh ba ka company ka la dep shna ia ka surok saw lynti (four lane) naduh jingkieng thymmai kaba don syndah ka Dawki PHC hynrei katba shajan ka shnong Bakur ka company ka dang tih ia ki lum ban pynpoi shaduh Tamabil.
Haba ioh ban iakren bad u Secretary shnong Dawki bah Arjun Pohlong u la iathuh ba ka jingtrei ia ka surok na Pynursla ha Dawki ka la ong kumba 60 percent bad u kyrmen ba kane ka surok kan dep noh ha u snem 2027-28 kumba la buh thong da ka sorkar.
U la iathuh ba ia kane ka surok la iaid kiar noh naduh Wahkdait ban iaid na khlaw ban poi sha Umsyiem bad na Umsyiem yn shna ia ka jingkieng thymmai ban poi shaneng ka Dawki PHC.
U kyrmen ba lada dep kane ka surok bad ka jingkieng ba thymmai kan pynsuk ia ki paidbah kiba wan kai namar kane ka surok kaba mynta ka long kaba rit.
