U Anant Ambani bad ka Radhika Merchant kiba la dep ïa poi kha ha ka jingïathoh shongkurim kaba heh bha ha ka 12tarik Naitung 2024 ha kaba palat shiphew hajar ngut ki briew na kylleng ka pyrthei ki la wan sha kane ka jingïathoh shongkurim kaba lai sngi.
Hadien san bnai jong ka jingrakhe, hangne ka don ka thup jong ki katto katne ki jingai sngewbha kiba phylla kiba kine ki arngut ki la ioh na ki kmie ki kpa bad ki nongshah khot sngewbha kiba wan na kiwei ki ri ka pyrthei.
Kawei na kum kine ki jingai sngewbha ba la pynthikna na ka bynta kine ki arngut kiba dang shu shongkurim thymmai, ki long ki jingthung, kiba la ai sngewbha ha ki da u Jackie Shroff.
Katba ki kmie ki kpa jong u Anant Ambani, u Mukesh Ambani bad ka Nita Ambani ruh ki la ai sngewbha ïa kine ki nongshongkha thymmai katto katne ki jingai kiba itynnad kynthup ïa ka ïing kaba heh bha kaba don ka jaka kaba heh haduh 3,000 phut square ha Palm Jumeirah kaba shongdor haduh 640 klur tyngka.
Nalor kane, u Anant u la ïoh ïa kawei ka kali Bentley Continental GTC Speed kaba shongdor T. 5.42 klur tyngka, ka kurim jong u, ka Radhika ka ïoh ïa ki jingdeng kiba la shna kyrpang, ba kynthup ïa ka brooch Cartier kaba shongdor T. 21.7 klur bad ka choker pearl and diamond kaba shongdor T. 108 klur na u Mukesh bad ka Nita.
Kham mynshwa, la antad ba ki nongwan jngohkai pyrthei ba pawnam ki ai sngewbha ïa ki mot bad ki dur ba rem dor kum ka jingleh niam ïa ki nongïapoikha thymmai.
Katkum ka khubor shaphang ka video ba la sam ha Instagram, hangne ka don ka thup jong ki katto katne ki jingai sngewbha ba phylla ba u Anant bad ka Radhika ki la ioh ha ka jingkhawai shongkurim jong ki na ki nongwan jngohkai jong ki nabar ri.
U president barim bad u CEO jong ka Amazon, u Jeff Bezos u la ai sngewbha ïa ki ïa ka kali Bugatti kaba shongdor Rs. 11.50 klur.
U aktor bad nongïalehkai ba tbit jong ka America, u John Cena u la ai sngewbha ïa ki ïa ka kali Lamborghini kaba shongdor Rs. 3 klur tyngka.
U CEO jong ka Facebook, u Mark Zuckerberg u la phah ia ki da ka liengsuin shimet kaba shongdor Rs. 300 klur, katkum kajuh ba mynta. Ka khubor ka la bynrap shuh shuh ba u Bill Gates u la ai sngewbha da ka jingdeng mawkordor kaba shongdor Rs. 9 klur tyngka. Hynrei kawei pat ka video kaba la sam ha ka X ka pynpaw ba la iathuh ba u Bill Gates u la ai sngewbha ia u Anant bad ka Radhika da kawei ka luxe yacht kaba shongdor Rs. 180 klur tyngka.
Shuh shuh, u Sundar Pichai u la ai sngewbha ia ka helicopter kaba shongdor Rs. 100 klur, katba ka Ivanka Trump ka la ai ia ki ia ka iing kaba heh bha ha US kaba shongdor Rs. 80 klur tyngka.
Katkum ka kaiphod jong ka BolywoodLife, ka Katrina Kaif bad ka Vicky Kaushal ki la ai sngewbha da u kynjri ksiar uba shongdor Rs. 19 lak sha ki nongiapoikha thymmai.
Kumjuh ruh u Siddharth Malhotra bad ka Kiara Advani ki la ai sngewbha da ka shawl ba la shna da ka kti kaba shongdor Rs. 25 lak, bad u Akshay Kumar u la ai sngewbha da u khulom ksiar kaba shongdor Rs. 60 lak tyngka.
Nalor kane, ka khubor ka la bynrap ruh ba u Shah Rukh Khan u la ai sngewbha ïa ka ïing kaba heh bha ha France kaba shongdor Rs. 40 klur, katba ki Bachchan ki la ai ia ka ryndang emerald kaba shongdor Rs. 30 klur tyngka.
Ka Alia Bhatt bad u Ranbir Kapoor ki la ai sngewbha ia ki da ka kali Mercedes kaba shongdor Rs. 9 klur tyngka.
Katba, u Salman u la ai sngewbha da kawei ka sports bike kaba shongdor Rs. 15 klur, katba u Ranveer Singh bad ka Deepika Padukone ki la ai kawei ka Rolls Royce kaba shongdor Rs. 20 klur tyngka.