Shillong 14 Iaiong:
U bah Monstar Nongdhar u ba long u tyngshop lamkhmat jong ka phlim “Lanot” ha kajuh kapor uba long u Trai ia kane ka phlim u la pyllait paidbah ia ka teaser mynta ka sngi Nyngkong ka 14 Tarik u Iaiong 2025, ha Shillong Pres Club.
Ia kane ka phlim “Lanot” yn sa pyllait paidbah noh shen ha bijou cinema, Shillong. Ha kane ka phlim la shimbynta da u bah Monstar Nongdhar kum u tyngshop bad i Lucy Diengdoh kum i Puron.
Ha kane ka sngi pyllait paidbah ia kane ka Teaser phlim “Lanot” la iadonlang ki tyngshop ki puron bad kiwei kiwei de.
Ha ka jingiakren bad ki lad pathai khubor u bah Monstar Nongdhar ula iathuh, ba ia kane ka phlim la sdang ban ringdur naduh u snem 2019 hynrei namar ka jingwan u Covid-19 ka la pynthud ia ka jingringdur bad ka kam ka la sdang sahtengnoh. Bad kumta hadien ba ka khlam Covid-19 ka la khuid nga sa sdang biang ban ringdur ia kane ka phlim.
Ha kane ka kynti ba mynta, u la iathuh, ba la pynkylla ia ka Script nadong shadong bad ka la long kumba la sdang thymmai biang naduh basdang bad ia kane ka phlim la ringdur ha ka ktien Khasi bad Pnar.
U la iathuh ruh, ba la kane ka khana jong kane ka phlim “Lanot” la pynwandur halor ka jing jia ba sngewsih ia kawei ka long iing. Nalor kata u ong, ba Kito kiba la iohi ia ki music video ba la dep pyllait ki lah ban pyrkhat ba kadei ka phlim jingieid lane ka love story film, hynrei kam dei kumta, ynda ki la wan ban peit ia kane ka phlim ha Bijou cinema, kin sa tip ia kaei ka jingjia kaba jia ha kane ka phlim.
U bah Monstar Nongdhar u la iathuh ruh, ia Ka jing iathuh khana jong kane ka phlim, ba don kawei ka long iing kaba duk ha kaba u kpa jong ka iing u shu bylla sngi ha ka par dewiong bad uwei u nong khaii dewiong. Katba dang iaid ka kam dewiong, ki dang ia ioh ka bam ha ling, Hynrei ynda la khang noh ia ki kam ba iadei bad u dewiong, u la ap lano yn plie biang ki kam dewiong, ha kaba u shu bylla.
“Nangta u iathuh, na Ka phlim ka long kaba itynnat shikatdei eh bad ki ba shim bynta ha kane ka phlim ruh kidei kiba la tbit bha ha ka kam ak phlim”. Bad Ki don bun ki jing kyllain ha ka khana jong kane ka phlim kumba ong ha ka ktien phareng ki twist, u la bynrap.
Shuh shuh u la ong, ba Ki paitbah ki la ju iohi ia u ha ki phlim khasi lyngba ka youtube bad ha Hello Meghalaya, hynrei ki iohi ia u ba ak sniew ne ak kum u gang, katba ha kane ka Phlim “Lanot” nga la shim bynta kum u main actor.
Kumta u bah Monstar Nongdhar u la kyrpad ia ki paitbah baroh jong ka bri u hynniewtrep hynniewskum ban wan ban peit ia kane ka phlim “LANOT” kaba itynnat shikatdei eh ha cinema ynda ki la ioh ia ka Tarik ba tikna.