Shillong Naiweing 13:
U babu Birbor Riangtem u ba dei kum uwei na ki rangbah shnong ka shnong Langdongdai, west khasi hills District bad ha ka juh ka por kum u nongialam ka Synjuk ki Rangbah shnong, Nongtrai sepngi, u la ong ba hadien ba la iohpdiang ia ka jingkyrpad na ki ASHA ka jylla ban ai ka jingkyrshan halor ka jingiakhih jong ki ban dawa na ka sorkar ban siew bai nong halor ka jingtrei shitom jong ki.
U babu birbor u la pynpaw ba kum ka shnong baroh kawei ka ai ka jingkyrshan met bad mynsiem ia ka jingdawa jong ki ASHA.
“Ha ka por Covid-19 ka sorkar ka pyndonkam ia ki ASHA bapli ki shim ruh wat ia ka jingim ban trei bad kohnguh ia ka jingphah ka sorkar hynrei mynta pat ki leh bym iohsngew pynban ia ki jingdawa jong ki” u la ong.
U la ong biang wat hadien ba ki ASHA ki la pynlong ka jingiakhih da ki taiew bad ki bnai hynrei Ka sorkar u conrad bad prestone kim sngap bad leh bym ioh sngew eiei.
Shuh shuh u babu Birbor u ong, ba lada phim lah ban pynbiang ia ki jingdawa jong ki ASHA,ki nonghikai, ki Aganwadi yn ym don ba khang ia phi wat ban hiar noh na ka shuki ba phi bat kum ki nongialam ia ka jylla, Namar ki don bun kiba bit ban bat ia kitei ki shuki.
“Ha ka por election phi kular ban pynbiang ia ki jingeh jong ki paitbah mynta pat kawei hadien kawei ka kynhun ka hap mih sha surok ban dawa bad ka thombor ia ki da ki ain ki kyndon bym shongnia ban pyntieng pynsmiej” la bynrap u babu Birbor.
Ka jingpynbiej jong phi ka mut ba phi pynbiej ia ki paitbah tang ha ka por election hynrei mynta ynda phi la ioh ia ka bor pat phi set kyllut ia la ki skhor bad kah ia la ki khmat.
U babu Birbor u la tangon tyngeh iala sorkar da ka ba ong ba wat pynbor ia ki ASHA ban shim da ki lad jingiakhih ba tyngeh hadien pynbiang shwa ia ki jingdawa jong ki bad kum ka jingiasnoh kti lang bad ki ASHA ka West Khasi Hills mynta ka sngi ki la pynlong da ka rally ha nongstoin ha ryngkat bad ki nongtrei ASHA ka jylla ban pynrem jur ia ka sorkar halor ka jingbym solve jong ki ia ka jingdawa ki ASHA.