Shillong:
U hehduh jong ka seng lehnoh ha Pakistan Jaish-e-Mohammad, u Maulana Masood Azhar, u la kam ba 10ngut ki dkhot jong ka iing jongu bad saw ngut ki nongiarap jongu, ki la iap ha ki jinghiar thma liengsuin jong ka India, hapoh ka Operation Sindoor, ban siew kylliang ia ka jingshah thombor jong ki lehnoh ia ki riew paidbah ka India ha Pahalgam, ong ka tnad pathai khubor PTI.
Ka kyrwoh kaba la kynnoh ba u Azhar, uba la shah kem ha India ha u snem 1994 bad uba la shah pyllait noh hadien ka jingshah rahbor jong ka Air India IC 814, ka ong ba kito kiba la ïap ha ka jingshah thombor ha ka jaka treikam jong ka JeM — Jamia Masjid Subhan Allah ha Bahawalpur — ki kynthup ïa ka para heh jong u, u tnga jong ka, u khun ksiew jong u bad ki khun ksiew jong u, ka tnga barim jong u.
“Shiphew ngut ki dkhot jong ka longïing jong nga ki la ïoh jingkyrkhu ïa kane ka jingkmen ryngkat mynta ka miet… phra ngut ki dei ki khun ki bym don pop, ka para kaba kham heh jong nga, u tnga ba donburom jong ka. U riewstad jong nga u Fazil bhanje (u khun ksiew) bad ka tnga jong u bad ka riewstad ba ieid jong nga ka Fazilah (ka khun ksiew) … u hynmen baieit jong nga u Huzaifah bad ki paralok jong u kine baroh ki la poi ha kti jong u Blei.
U la ong ba um don “ka jingsngewsih ne jingduh jingkyrmen”. “Hynrei, ka wan ha ka dohnud jong nga ba nga ruh ngan jin da la iasoh bad kane ka kynhun ba kmen kaba don shiphew ngut ki dkhot,” u la bynrap. U lehnoh u la ong, “Ka por ban leit noh jong ki ka la poi, hynrei U Trai um shym la pyniap ia ki.”
U Masood Azhar, uba 56 snem ka rta, uba la don ha ka thup ki lehnoh jong ka pyrthei da ka UN Security Council, u la donkti lang ban aibuit sha lyndet jong ki jing thombor kiba bun tylli ha India, kynthup ïa ka jingthombor ha Parliament ha u snem 2001, ka jingthombor ha Mumbai ha u snem 2008, ka jingthombor ha Pathankot ha u snem 2016 bad ha Pulwama ha u snem 2019. Wat la ka long ka jingmaham kaba paw ba une u lehnoh u don ha Pakistan, hynrei ka Islamabad ka la kyntait bunsien ba kam don jingtip shaphang jong u.
Ka India ka la siat 24 tylli ki precision missile ha ki 9 tylli ki jaka ha Pakistan bad ka Pakistan Occupied Kashmir hynnin ka miet ban siew kylliang ia ka jingshah thombor ba shyrkhei jong ki lehnoh ha Pahalgam ha kaba 26 ngut ki riew lum pop ki la shah pyniap ha ka snam khriat. Ki tyllong khubor na ka sorkar India ki la iathuh ba palat 70 ngut ki lehnoh ki la iap bad palat 60 ngut ki la mynsaw ha ki jingshah thombor.
