Weng iakhih shipor ka KSU ban ailad ia ka NEIGRHIMS ban pynbeit shwa ia ki kynrum kynram

Shillong 05 Jymmang:

Ka Khasi Student Union (KSU) ka ba la pynlong da ka jingiakhih hakhmat ka ophis treikam u Director ka NEIGRHIMS myn ha kine ki sngi ba ladep, ban dawa pynbeit shwa ia ki kynrum kynram ban  thungkam thungjam hapoh katei ka jaka ai jingsumar.

Hadien ka jingiakhih ka seng da kaba shong kyllaiñ mungor hakhmat ka ophis treikam u Director ka ba la neh kumba katto kattne sngi eiei, Ka seng mynta ka sngi Nyngkong ka 05 Tarik Jymmang 2025, ka la Weng shipor ia ka jingshong iakhih namar ban ailad ia ka NEIGRIHMS ban pynbeit shwa ia ki jingkynrum kynram.  Bad ia ka advertisement la pynsangeh shuwa shipor katba ki mat ba ka seng ka la dawa ym pat pynbiang.

Ia kane karai ba ka seng ka la shim, kadei hadien ba na ka liang ka sorkar jylla ka la khot ban iakren halor ka jingjia ha NEIGRHIMS, ban iatai ia kane ka kam, ka ba la pynlong ha State Convention Centre.

Na ki mat jingdawa jong ka Seng, ki mat ba lah ba pynbeit hi na ka NEIGRIHMS yn sa pynbeit bad ia kiwei kiwei ba ym lah yn sa shim ia ka rai da ka Governing Council bad ka seng ka buh ruh ia ki mat jingdawa ha khmat ka Ministry of Health & Family Welfare, Govt of Meghalaya halor ha bhah jong ki ST.

Ha ka Governing Council ba la long mynta ka sngi, la iadon ki Dkhot ba kynthup ia Secretary, Ministry Health & Family Welfare, MPs jong ka Meghalaya, Commissioner & Secretary jong ka Heath Dept, Govt of Meghalaya, ryngkat ruh bad ki nongialam ba hakhmat eh jong ka KSU bad kiwei kiwei de.

Haba kren sha ki lad pathai khubor u President ba rangbah jong ka KSU u samla Lambokstar Marngar u la ong, ba ka KSU kam ju bam jakhluit hynrei ka iaishah, ym na ka bynta jong ngi, hynrei na ka bynta ban Pynurlong ia kimat ki jura ba ka seng ka la buh hakhmat ka NEIGRHIMS.Haba bynrap pat na ka liang u General Secretary u samla Donald Thabah u la ong, ba ha ka jingiatai hynne ka sngi ki la pyndem tuin hakhmat ka seng ban kohnguh ban pynbeit shwa ia ka rukom thungkam thungjam ha NEIGRHIMS.

Ha ka jingiakren ka seng hynne ka sngi, ka la dawa ba kat bym pat kongnguh ia ki mat jingdawa ka seng, ym bit ban thungkam thungjam namar ki paradoh parasnam jongngi kim iohkam, hynrei ioh tang ki briew ba nabar.Kumta u samla Donald Thabah u la iathuh ba hynne ki la pyndem tuin hakhmat ka seng ban ong, ba kin hap pynsangeh shwa ia ka thungkam thungjam katbym pat pdiang ia ki mat jingdawa ka seng.

Ha ka jingiakren ki la leh ban pynbiej ki la leh ban ialam bakla ia ki nongialam ka seng, hynrei ka seng ka la leit da ka jingpynkhreh bad ia ki jingialam bakla ka seng ka la pynsangeh bad ki la sngap jar, ka bynrap u samla Donald.