Shillong 19 Naiwieng:
U samla Steve jyrwa uba la jop ha ka Indian Best Dancer Season -4 ba la long ha Mumbai ha kine ki taiew ba la dep, mynta ka nohphai sngi, ka 19 tarik Naiwieng 2024, ula poi ha Air Port Guwahati, ban wan sha Nongbah Shillong, kum kadak ban ai khublei ia ki paidbah ka jylla ki ba la kyrshan ia u naduh ka ba sdang haduh ba un da iohrah syndon ia ka nam jop.
La sakhi ba ki paidbah jong ka jylla ki la ia ap ia u samla Steve ha Guwahati Air port ban synran ia u ban wan sha Shillong, ha kaba mar shu poi u Steve ha Guwahati Air Port ki paidbah ki la iaknieh ban iashondur lang. Ha kane ka sngi La synranlang da ki bahaiing hasem u samla Steve, ka kmie, I meiieid bad ki paidbah ka jylla ruh kumjuh.
Mynta u samla Steve ula mih na Guwahati air port ban wan sha Nongbah Shillong, ha ka ba nakaliang ka Jylla kan sa pynkupburom ia u ha Madan Polo hadien ba ula wanrah ia ka nam ha la jylla.
Hashwa ba u samla Steve un wan sha Shillong la shah pynkupburom shwa ha Guwahati ban spong da ka jain tynrai u Khasi.
Ia u samla Steve mynta ka sngi la synran da ki pulit ka jylla khnang ban lait na kano kano ka jingsahkut ne pynwit ka lynti iaid ban poi kloi sha Nongbah Shillong. La ioh jingtip ruh, ba u samla Steve un sa leit phai noh mynta hi ka sngi sja Mumbai namar u hap ban shad biang sa kawei pat ka jingshad ba la tip ka Super Dancer, ha ka ba la shah jied ia u namar tbit palat ban shad.
Kum ban shupynkynmaw hangne, ba u Steve ula jop ia kane ka Indian Best Dancer ha ka jingiakhun ka ba la long myn ha ka 10 tarik Naiwieng 2024, ha kaba kidon haduh 6 ngut ki nongiakhun ha ka Final bad u Steve ula khur ia ka jingjop, da kaba ioh haduh 15 lak bad kawei ka kali Swift.