Shillong 16 Naiwieng:
U samla Steve jyrwa uba la jop ha ka Indian Best Dancer Season-4 ka ba la long ha Mumbai, un sa wan ban iuhkjat ha Nongbah Shillong ha ka 19 tarik u Naiwieng 2024, ka ba dei ka sngi baar.
Ia kane la pyntip da u bah kitbok Thabah uba dei u president ka All Meghalaya Dancer Association (AMDA) ha ka jingiadonlang ruh ki bahaiing hasem jong u Steve.
U bah kitbok Thabah ha ba iakren bad ki lad pathai khubor mynta ka sngi saitjain ka 16 tarik ula iathuh, ba u Steve un wan ha kapor mynstep ha ka 19 tarik bad ban pynkupburom ha Polo Grounds, Shillong, ha kaba ha katei ka sngi kan don ka jingpynlupburom kyrpang ia u Steve uba la wanrah nam ia ka jylla baroh kawei bad kan don ruh ka jingshad kyrpang na u Steve.
Ka jingwan jong u Steve kalong kum ka dak ban ai khublei ia baroh ki paidbah jong ka jylla ki ba la ai ka jingkyrshan ba pura naduh ka ba sdang ban vote ia u, haduh ba un da rah syndon ia kane ka namjop ha ka Indian Best Dancer.
U bah kitbok Thabah ula pyntip ruh, ba u Steve u hap ban leit phai biang sha Mumbai ha katei hi kajuh ka sngi ka 19 tarik bad unwan tang kumba 2 ne 3 kynta eiei ha Shillong, namar u hap ban shad biang sa kawei ka jingshad ka ba ula shah jied, ia kaba la tip kyrteng ka “Super Dancer”.
Ki paidbah ka jylla ki la kwah bha ban iohi bad ban ai khublei ia u Steve Jyrwa uba la jop ha katei ka jingiakop shad ka ba heh jong ka Ri, ha kaba ki paidbah ki la kyrshan bha ia u Steve, kumta nakaliang ka kmie u Steve bad ki bahaiing ki la ioh ban iakren ia ki nongpyniaid ba kin sngewbha ban ailad shisngi ba un wan sha Shillong, ban ai khublei ia ki paidbah, la bynrap u bahut Kitbok Thabah.
Ha katei ka sngi kandon ka jingpynkup burom ia u Steve ha madan Polo, bad u bah AL. Hek ruh uniadon ryngkat, ki ohisar ka department jong ka Arts and Culture ruh kin don ryngkat bad ka AMDA ka la phah ruh ia ka shithi sha u bah Paul Lyngdoh, u bah Sniawbhalang Dhar bad sha u Myntri rangbah ka Jylla u Conrad K. Sangma ba kin iadonlang ha katei ka sngi pynkupburom ia u Steve.
“Nakaliang ka kong B. Jyrwa ka ba dei ka meisan jong u Steve kala pynpaw ka jingkmen hadien ba u Steve ula jop ha kane ka jingiakop shad bad ruh ka la ai khublei sha ki paidbah ki ba la kyrshan naduh basdang ia u Steve”.
Shuh ka la iathuh ruh, ba ha kapor ba shad u Steve ki donlang ha Mumbai bad ki nongpyniaid jong ka Indian Best Dancer ki la iapbiej tang ia ka jingshad jong u Steve namar u long una tbit bha bam shad napdeng kiwei pat ki para ba iashadlang.