Shillong 04 Risaw:
Ki nongialam sengsain pyrthei ki ba kynthup ia ka Voice of The People Party (VPP) bad ka National People party (NPP) ki la wan ban ai ka jingkyrshan ia ka jingiakhih shong kyllain mungor ki lai tylli ki shnat ka seng, kata ka KSU Sawsymper circle, KSU Balat border area bad ka KSU Lawbah border area circle, ban dawa pynurlong ia ka jingdawa jongki ban kyntiew noh ia ka mawsynram C&RD Block sha ka Civil sub-division.
Na ka liang ka NPP la wan ban mihkhmat da u bah HM. Shangpliang MLA barim ka Mawsynram bad u bah Alvin. K. Sawkmie MDC ka Mawsynram katba na ka seng VPP la wan mihkhmat da u bah Resivan Shangpliang.
Ha ba ai jingkren na ka liang kine ki nongialam ki la ong, ba ka mawsynram ka la biang bad dei hok ban kiew kyrdan noh sha ka Civil sub-division.
Ki la ong ruh, ba kadei ka mon sain pyrthei, ba ka South West Khasi Hills District, Eastern West Khasi Hills ki ba don tang ar tylli ki konstitwensi, hynrei ki la ioh ia ka district bad kan eh aiu pat ia ma Mawsynram ba kan ioh ia ka Civil sub-division.
Ym tang katta hynrei ki la wer ia ki paidbah ka dong ka thain baroh kawei, ba kidei ban ai ka jingkyrshan ia ka jingiakhih dawa ka seng ban kyntiew kyrdan noh ia ka mawsynram sha ka Civil sub-division.