Shillong 04 Risaw:
Ka University of science and technology Meghalaya (USTM) kaba dei ka skulbah ba la pynskhem da ka NAAC, ka la pynbna, ba da ka jingsngew sarong ba ka la kynjoh ia u mawjam ka ba kongsan ha ka jingïaid lynti jong ka, ha ka jingpule jong ka, da ka jingmynjur na ka tnad ka koit ka khiah, ka sorkar India bad ka National Medical Commission (NMC) ka ba la mynjur ïa ka PA Sangma International Medical College and Hospital (PIMC), da ka jingtreilang jong ka USTM bad ka sorkar Meghalaya.
Ha kane ka university kaba la pyndap da ki jaka hikai-pule kiba kham tbit bad ka jingpyrkhat halor ka jingwad bniah bad ka jingpynwandur thymmai, ka thmu ruh ban khring ïa ki samla pule kiba don sap na kylleng ka ri bad shabar kumjuh.
“Da ka kynhun ba nyngkong eh jong ki 150 ngut ki samla pule, ka PIMC ka la pynkhreh ban buh ïa ki kyndon kiba thymmai ha ka jingpule ha ka ba iadei bad ka koit ka khiah bad ka jingshakri ha ka koit ka khiah”.
Ha kaba iadei pat bad ki jaka sumar, yn ai ia ki jaka sumar ba 50 per cent na ka bynta ka jingsumar ba kyrpang sha u nongpang na ka jylla Meghalaya ryngkat bad ki jaka sumar ba kyllum khlem jingsiew. Kawei na ki jingthmu ba kongsan ka long ban khring ia ki Ri ASEAN, ban ioh ia ki lad jingsumar jong ka PIMC ha ka por ban wan.
Da kaba ithuh ïa ka jingnoh synñiang jong u Dr. Donkupar Roy bam kwai ha dwar u Blei, u ba dei u Myntri rangbah barim ka jylla Meghalaya, ki bor pynïaid ki la rai ban pynkhreh da ka Dental college kaban sa wan kum ka jingburom ïa u Dr Donkupar Roy.