Shillong 02 Risaw:
U symbud myntri rangbah ka jylla u bah Prestone Tynsong u ba dei ruh u MLA ka Pynursla Konstitwensi u la la wanphai sha Shillong naduh ka 26 tarik Nailur 2024 hadien ka jingshah sumar ha Delhi.
Ha ba leit ban buddien ia kane ka khubor, na ka liang ki nongthoh khubor ki la leit sha iingsah jong u bah Prestone Tynsong mynta ka sngi balang ka 02 tarik Risaw 2024 ka ba don ha Pohkseh, ban iakynduh ha ka ba iadei bad ka koit ka khiah, hynrei la sngewthuh ba u bah Prestone um pat lah ban iakren ha ki lad pathai namar u dang shu wan poi ha Shillong.
Kumta na ka liang ki nongthoh khubor ki la ioh ban iakren bad u bah Holywell Khongstid u working president ka national People’s Party (NPP) bad u bah Nibaron Binan Vice President NPP na Pynursla ki ba la wan peit ia u bah Prestone mynta ka sngi ha iingsah jong u.
Ha ka jingiakren bad u bah Holywell Khongstid u la iathuh, ba ka jingkoit jingkhiah jong u bah Prestone mynta ka la kham biang kumba ka long ha kipor baroh bad u la khlain bha haba ia shongkai iathuhkhana.
U la ia iathuh ruh, ba ha kine ki taiew ban wan u bah Prestone un sa lah ban leit shongbiang ha Ophis ban pyniaid ia ki kam.
Kum ban shu pynkynmaw hangne ba u bah Prestone Tynsong u la leit ban shah sumar ha Nazareth Hospital, Shillong, namar ka jinglang snam ha ka jabieng, hynrei na ka jinglong jingman la pynkitnoh ia u bah Prestone Tynsong na Nazareth Hospital sha nongbah Delhi na ka bynta ka jingsumar ka ba khambniah.