Shillong 23 Nailur: Ka seng Awakening India Movement (AIM) ha ka jingialam khmat u bah Banshai Marbaniang mynta ka sngi nyngkong ka 23 tarik nailur 2024, ki la mih paidbah ban pynlong da ka jingiakhih, ban pynsngew sha ka sorkar jylla halor ka jingkiewdor ki Marbam mardih.
Ka seng ka la pynlong shwa ia ka jingialang ba lyngkot ha ka ophis PWD ka ba don mar pyrshah bad u Mot Kiang Nangbah, jan Civil Hospital, Shillong.
U bah Banshai u la ong, ba mynta ki marbam mardih ki la kiew dor lut ha ka jylla jong ngi da kaba u la ai nuksa, ba u soh Balensha u poi haduh 200 shikilo katba ha ka jylla Assam une u soh u poi tang kumba 80 tyngka shikilo bad kane ka pynsah ha ka lyngngoh iangi, ong u bah Banshai.
Ka jingkiewdor ki marbam mardih ka ba la ktah shibun ia ki nongshong shnong ka jylla khamtam ki ba wan na ki longiing ki ba duna ha ka ioh kakot bad kane ka mat kadei ruh ba ka party Voice of The People Party(VPP) ka la rah sha ka iing dorbar thawain ka jylla ka ba dangahi dep shen bad ka ba la pynlong ruh da ka jingiakhih shong kyllain mungor ha madan malki, ban pynpaw ia ka jingoyrshah ia ka sorkar jylla bym leh eiei halor kane ka mat.
U bah Banshai u la ong, ba ka seng ka la phah da ka jingthoh sha ki 59 ngut ki nongmihkhmat,ban kren sha iing dorbar thawain, hynrei u la pynksan da kaba ong, ba kane kamat ka la kylla long pynban ka “political issue”.
Ha ba iadei pat bad ka jingshon adhaar, na ka liang u bah Banshai u la ong, ba lada ka jingpynbor ban shim ia u adhar, kata kamut ba ka sorkar jylla ka iuhroit ia ka riti synshar paidbah ban pyndam noh ia ka article 19 haduh ka article ka ba 37 jong ka Indian Constitution ka ba khein iangi shimet shimet ba ngi dei ki mraw.
“Ngim shem wan ban dawa ban ioh jingmyntoi shimet jongno re jongno hynrei na ka bynta u paidbah ka jylla, ba ngi hap ban kren hap pyni ia ka jingshisha”, ong u bah Banshai.