Shillong:
U John Abraham uba dei u tyngshop ba pawnam ha ki phlim Bollywood mynta ka kynti ka la hiar bha ka iew ak phlim jong u haba pyllait ha ki cinema hynrei une u khlur ak phlim uba dei trai jong ka North East United Football Club u la kiew pat ha ki kam ialehkai phutbol namar ka team ka jong u ka la rah champion ha ka final football Durand Cup kaba dang shu kut myn ha ka 31 tarik August ha Kolkata.
Ka phlim kaba la ak da u John Abraham ka Vedaa kaba dang shu pyllait ha ka 15 tarik august 2024 ha baroh ki cinema ha India ka la long kaba phlop ha ka box office namar ka la kamai tang 25 klur namar la bun palat ka jingpynlut.
Watla ka phlim jong u ka Veda aka la phlop katkum ka Box Office hynrei ka la pynkmen noh ia u John namar ka team phutbol Indian Super League kaba la dei trai da ma u ka North East United FC ka la ioh rah jingjop ha ka sien kaba nyngkong ha jingialehkai phutbol kaba 133 Durand Cup hadien b aka la pynliem ia ka Mohan Bagan da ka jingiakynjat penalty kaba la long ha Kolkata.
Namar ka jingbym iaid iew shuh ki phlim ba la ak da u John Abraham mynta u la don ha ka number kaba khadlai ha ka jingsiew dor ia ki tyngshop ki phlim Hindi namar ka dor ba ki trai phlim ki siew ka long 20 klur na bynta kawei ka phlim. Katba u tyngshop uba heh jingsiew haduh mynta uba wan ba nyngkong ha ki phlim Hindi u dei u Shah rukh Khan uba la siew 150 klur haduh 250 klur kawei ka phlim.
Ka phlim kaba sdang ban phlop ka dei naduh ba la ak ia ka phlim Pagalpanti kaba la pyllait ha cinema ha 22 tarik November 2019 ka kamai tang 33 klur ha box office hynrei ka jinglut ka bun shah. Ka Mumbai Saga kaba la pyllait ha 19 tarik March 2021 ka kamai 16 klur tyngka ha ki cinema, ka Satyameva Jayate 2 kaba la pyllait ha ki cinema ha 25 tarik November 2021 ka kamai 13 klur hynrei ka jinglut ka bun, ka Attack – Part I kaba la pyllait shi tarik april 2022 ka kamai tang 13 klur, ka Ek Villain Returns kaba la pyllait ha 29 tarik july 2022 ka la kham biang namar ka la kamai 41 klur tyngka bad ka Vedaa kaba dang shu pyllait ha 15 tarik august 2024 ka la hap ha ka phlop namar ka kamai tang 25 klur tyngka.