Shillong:
U samla Redeem Tlang u samla khasi ba tang marwei uba ioh rung ha ka North East United FC kaba dei ka team kaba ialehkai ha Indian Super League u la pynpaw ka jingsngewkmen ban ioh ialehkai biang ha JN Stadium Polo lashai ka sngi ka 26 tarik Nailar 2024 hadien san snem ba u la mih na Shillong Lajong FC.
U Radeem Tlang uba la wan poi sha Shillong ryngkat ki rangialehkai na North East United ryngkat u Coach haba iakynduh bad ki nongthoh khubor u la pynpaw ka jingsngewkmen ban ialehkai biang ha madan Polo hadien san snem ba u la mih na Shillong Lajong.
San snem mynshwa nga la ialehkai ha Madan Polo haba nga dang don bad ka Shillong Lajong bad lashai ka sngi kan dei ka sien kaba nyngkong ba ngan iakhun pyrshah ia ka Shillong Lajong.
U la pynpaw ba ka jingiakhun lashai ka long kaba jwat namar ki dei ki team baroh ar tylli ki dei na North East.
Watla u Redeem Tlang kham bunsien u ioh mih hadien ba la wai shiteng ka jingialehkai ha kine ki jingialehkai ba la dep hynrei la sngewthuh ba ka North East United kan pynieng ia u naduh basdang ka jingialehkai ha ka por 5:30 janmiet khnang ba kin ioh ia ka jingkyrshan kaba pura na ki paidbah ka nongbah Shillong.
Ka North East United kaba ju ialehkai ha Guwahati ha Indian Super League kaba la dei trai da u tyngshop ki phlim Bollywood u John Abraham bad kane ka team kan dei ka sien kaba nyngkong ba kan ialehkai ha Shillong lashai ka sngi ha Semi Final ka Durand Cup 2024.
Ka Shillong Lajong FC kaba dei ka team I-League ka la lah ban pynliem ia ka East Bengal kaba dei ka team ISL ha ka Quarter Final bad iakhaid mar shikol bad ka FC Goa kaba dei ka team ISL bad lashai ka sngi ki rangialehkai Shillong Lajong kin hap ban iakhun tyngeh ban jop ia ka North East United khnang ba kan poi sha ka Final ka ban long ha Kolkata ha ka 31 tarik mynta u bnai.
Kane ka jingalhekai semi final ha Shillong ka la pynkhih mynsiem lut ia baroh ki paidbah ka jylla namar ki paidbah ki la lei tap tiket naduh 7 baje mynstep ha ka sngi saitjain wat lad aka tiket la sdang die ha ka por 2baje janmiet hynrei ki paidbah kiba duh tiket ka long palat da ki phew hajar ngut.
Ki rangkynsai ka Shillong Lajong FC kiba ki paidbah ki ju sngewtynnad ban pyrta na jaka shong ki long u Hardy Nongbri u captain, u Phrangki Buam bad ar ngut ki rangialehkai kiba tbit na Brazil.