Shillong, Nailar 13:
Kawei ka kynthei – kaba la teh ïa ki kjat – ka la shah teh ha ka thuk thuk bad la tan ia ka surok khyndew da u lok jong ka hynrei ym don ba iarap haba la pyrta, kane ka la jia ha distrik Nagaur jong ka Rajasthan.
Nangta uta u briew u hiar na ka thuk thuk jong u bad u ieng halor kata ka kynthei, kaba la mynsaw, ha ka jingpang, bad kaba iam na ka jingshah pynmynsaw ha ka met bad ka jingmut jingpyrkhat jong ki khyndiat sekhon ba la tan da ka thuk thuk.
Ka video kaba 40 sekhon jong katei ka jingshah thombor – kaba la ngeit ba la leh ha u bnai ba la dep – la pynsaphriang ha social media kaba la ktah ia ka jingmut jingpyrkhat jong ki para briew.
Ki don ki khubor kiba la iathuh ba u dei u tnga uba la thombor ia ka tnga jong u namar ba ka kwah ban leit jngoh ia ka para jong ka ha Jaisalmer. Hynrei kam lah shuh ban leit sha kiwei ki jylla namar ia la shah ‘thied’ ha uwei u rangbah.
Ki kynthei kiba la shah ‘thied’ ha kane ka rukom ki mad ia ka jingshah lehbein kaba jur tam ha ka met, ka jingmut jingpyrkhat bad ha ka jingshongkha na u ‘tnga’ jong ki. Namar ba ki la shah thied la pynbor ia ki ban trei ha ki kper bad la pynbor ia ki ban leh ia ki kam iing, bad ban shakri ia u tnga.
Ki pulit jong ka thain ki ong ba kin tohkit ia baroh arliang, kaba ar ka dei ka jingkhaii briew.
Ki tyllong khubor ki iathuh ha ka NDTV ba katei ka kynthei ka lah ban dei kaba la ‘thied’ da utei u rangbah- uba la tip kyrteng kum u Prem Ram Meghwal, uba la don ha ka rta kaba 40 snem ei ei, uba khlem kam, bad la iathuh ba u la kyrni ha u drok- kumba 10 bnai mynshwa ha ka pisa kaba ₹ 2 lak .
Na ka liang jong ki pulit ki la shimti ia u bad ki la iakynduh ia katei ka longkmie, kaba don mynta ha Jaisalmer.
Ki pulit kiba la tohkit ki lga ioh ka khubor ba u shynrang bad ka kynthei ki la don katto katne ka jingiakynad namar ba ka kwah ban leit sha ka para jong ka.