Shillong, Nailar 08:
U nongialam ka liang pyrshah ha iingdorbar thawain bah RV Lyngdoh uba dei u MLA ka Congress na Mylliem constituency u la ong ba haduh mynta um pat tip thikna la kita ki lai ngut ki MLA Congress kin leit ban pyniasoh sha ka seng NPP.
Haba u nongthoh khubor u la ioh ban iakren kyrpang bad u bah RV Lyngdoh ha phyllaw ka ophis ka Khasi Hills Autonomous District Council (KHADC) hadien ba u la wan iakynduh ia u CEM bah Pyniaid Syiem u la ong ba haduh mynta ym pat don kita ki MLA Congress ban pyntip ba kin rung noh sha ka seng NPP.
“Lada kita ki lai ngut ki MLA Congress kin mih noh, nga la sah satang marwei kum u MLA” u la ong.
Haba u nongthoh khubor u la pyrshang ban kylli da kiwei pat ki jingkylli, u bah RV Lyngdoh um kwah than ban jubab namar u ong ba ia kane ka kam un sa wad jingtip ba kham bniah la ka dei ne em kaba shisha.
Kumban shu pynkynmaw ba ki lain gut ki MLA Congress kiba pynkhreh ban rung sha ka seng NPP kaba ialam ia ka sorkar jylla ki long u MLA na Umsning constituency Dr. C Lyngdoh, u MLA na Mawhati constiutuency bah Charles Marngar, U MLA na Nongstoin constituency bah Gabriel Wahlang.
Ki khubor ki iathuh ba kine ki MLA Congress ki thmu ban leit pyniasoh pura sha ka seng NPP namar kim kwah ba ha KHADC kin iatreilang bad ka NPP katba ha iingdorbar thawain kin shong liang pyrshah namar u bah Gabriel Wahlang, bah Charles Marngap bad bah RV Lyngdoh ki dei ki MDC bad MLA.
Ki khubor ki iathuh ba kane ka jingthmu ban rung sha ka seng NPP ka dei namar ba u bah Vincent Pala uba dei u President ka MPCC u don bha ka jingiajan bad ki nongialam ka NPP.
Shuh shuh ki khubor ki iathuh ba naduh ba mih ka khubor, kane ka jingiakren hapdeng ki nongkyrshan jong kine ki MLA bad ka jingiakren bad ki nongialam ka NPP ka dang iaid ka jingiakren shwa ban rung pura sha ka seng NPP.
Sa kawei ka khubor ki iathuh ba ka jingbym lah u bah RV Lyngdoh ban rung sha ka NPP namar ka jingkhang kam shym la plie namar la don lypa u MLA barim uba dei ruh u myntri barim ka sorkar MDA-1 bah Hamlet Dohling uba bat mynta kum u nongaibuit jong u Myntri rangbah ka jylla u Conrad Sangma, katba kiwei ki constituency kim da don jingeh ia ki MLA Congress ban rung sha ka npp.