Shillong, Naitung 26:
Ki nongialam ka kynhun jong ki Autonomous District Council bapher bapher hapoh ka thain shatei lam mihngi ka Ri kiba kynthup ia ka Tripura, Bodoland, Karbi Anglong, Dima Hasao, ka Khasi Hills, Jaintia Hills, Garo Hills bad ka Chakma kiba don kumba 10 tylli ki autonomous District Council mynha ka 25 tarik Naitung 2024 ki la iakynduh ia u Myntri ka tnad ki kam pohiing ka Ri u Amit Shah ha nongbah Delhi.
Ha kane ka jingialang kaba la neh kumba shiteng kynta ei ei na ka liang ka kynhun ka la pynpaw ia ki jingdonkam ha kaba iadei bad ka jingpynkylla bad pynbeit thymmai ia ka khyrnit kaba hynriew jong ka riti synshar ka Ri .
Haba ai jingkren hadien ba la dep iakynduh ia u Amit Shah, u Bah Pyniaid Sing Syiem, u CEM ka KHADC bad Convener ka kynhun ADC u la ong ba ki District Council bapher bapher hapoh ka thain shatei lam mihngi ka Ri ki don la ka jong ka nongrim ban pynsngew ha u Amit Shah ha kane ka sngi ba leit iakynduh bad na ka liang jong u myntri u la kular ba hapoh ka 25 tarik Nailar yn pyndep lut ia ki jingpeit bniah bad kan don ka komiti ka ban khlieh da u Myntri khynnah ka tnad ki kam poh iing ka jylla .
Ha kajuh ka por na ka liang ka kynhun ADC ka pynpaw ka jingsngewnguh ia u Myntri ka tnad ki kam pohiing ka Ri uba la shimkhia bad kular ban pyndep ia ka kam ha ka por kaba biang.
Shuh shuh na ka liang u Bah Pyniaid ula pyntip ruh ba hadien ka jingioh ban iakynduh ia u Amit Shah kan sa don pat ka jingialang jong baroh 10 tylli ki Autonomous District Council ka ban long ha nongbah Shillong ha ka 10 tarik u Nailar 2024 na ka bynta ban iakren bad iamir jingmut halor kiba bun ki bynta kum ki nongialam jong ki Council.