Shillong, Naitung 03:
Ka Balarisuk Myria kaba dei na ka shnong Nartiang, West Jaintia Hills District kaba dang shu pyndep iaka jingpule ha St Edmund Higher Secondary school, Shillong ha ka science mynta u snem 2024 ka la ioh ha ka kyrdan kaba khyndai ne 9th position ha ka Higher Secondary School Leaving Certificate 2024 hadien ba la ioh biang sa hynniew mark na ka jingphah peit bniah biang ha ophis ka Meghalaya Board of School Education.
Ka jingioh ha kane ka kyrdan kaba khyndai ha ka thup Top ten ka dei hadien ba la ioh biang iaka marksheet kaba thymmai naka MboSE mynta ka sngi ka 2 tarik Naitung 2024 hadien ba la phah peit bniah biang kaba la ioh sa hynniew mark.
Haba iakren bad ka Balarisuk Myria ka la iathuh ba ha ka jingpynbna ka Mbose iaka result mynha ka 8 tarik jymmang 2024 kam shym la ioh ha ka Top-10 namar ka duna satang lai mark hynrei mynta haba ka la phah peit biang ka la ioh ha ka kyrdan kaba 9 hadien baka la ioh sa 7 mark.
Ka la iathuh ba ha ka jingpynbna ba nyngkong ka ioh 451 mark bad mynta ka la ioh 458 mark.
“Nga sngewkmen haba nga ioh ia kane ka kyrdan kaba khyndai watla nga la ioh hadien shibnai tam hynrei nga don ia ka thong ban long doktor namarkata mynta u snem nga khlem bteng ia ka B.Sc namar ngan pynlut ia ka por ban shah hikai ban thoh ia ka eksam NEET” ka la ong.
Ka la iathuh baka eksam SSLC ruh ka ioh ha ka kyrdan kaba 14 ha ka Top-20 na Laitumkhrah Bengalee SS.
Haba iakren bad u kni jong ka Balarisuk Myria bah Yoowanmi Myria u la iathuh ba hadien ba ka MBoSE ka la pynbna ia ka result Science stream kim da sngewhun namar ka Balarisuk ka don jingkyrmen ban ioh top-10 kumta ki la pan nyngkong ia ka Xerox copy bad hapoh 20 sngi ki la phah peit bniah biang ia ki lai tylli ki subjek.
U la iathuh ba hadien ba la phah peit bniah biang ia ki lai tylli ki subject ka Biology ka ioh san mark, ka Physic bad Chemistry ka ioh mar shi mark.
Kumta u la kyntu ia ki samla pule lada kim sngewhun ia ki mark ki dei ban phah peit bniah biang sa shisien kata ka dei hapoh 20 sngi ba la ioh result.
U la ong ba kane ka jingioh biang ia ki mark hadien ba la phah peit bniah kam dei ka jingbakla ki nonghikai hynrei namar ki la peit bun ngut ki nonghikai ka don beit hangne hangtai ka jingbakla.