Shillong, Jylliew 22:
U kyrtong ka Voice of the People Party (VPP) u Dr. Ricky AJ Syngkon u la ong b aka seng ka la dep khreh kot ka la dep thoh ruh ia ka eksam hynrei ka resot ne ka jubab na ki paidbah yn ap beit haduh ka 4 tarik Jylliew 2024.
Ka jingiakren bad u Dr. Ricky Syngkon ka long ban sngap ia ka jingsngew jong u haba ka sngi niew vote ka sah satang ar taiew ban kynjoh sha ka 4 tarik Jylliew 2024.
Ki paidbah ka jylla Meghalaya kata ha Shillong bad Tura constituency ki la dep thep vote ha ka 19 tarik Iaiong 2024.
U Dr. Ricky u la ong ba haduh mynta um lah ban ioh jingkhein namar um lah ban iohi haba ki paidbah ki rai marwei marwei ha jaka thep vote hynrei u don jingkyrmen ba ki paidbah kin rai ia kaba bha tam.
“Kumba ngi la trei shitom ngi la pynshai sha ki paidbah ha ka por ilekshon ka long ruh kumba ngi la dep khreh kot, ngi la dep thoh ruh ia ka eksam bad mynta ngin ap satang ia ka jubab ha ka 4 tarik jylliew 2024” u la ong.
Ki kyrtong kiba la mih madan ha kane ka ilekshon MP na Shillong constituency ki don haduh hynriew ngut kata u Dr. Ricky Syngkon na VPP, bah Vincent Pala na Congress, kong Ampareen Lyngdoh na NPP, bah Robertjune Kharjahrin na UDP, bah Lakhon Kma bad Peter Shallam kum ki kyrtong shimet.
Kane ka jingslem ban niew ia ka vote haba ki paidbah ki la dep rai ha ka 19 tarik Iaiong ka long ban ap lang haduh ban da pyndep thep vote ha kiwei ki jylla khnang ban niew lang ha ka juh ka sngi kata ka 4 tarik jylliew 2024.