Shillong, Jymmang 18:
Ki paidbah ka jylla Meghalaya khamtam ki nongkyrshan jong ki hynriew ngut ki kyrtong kiba hap ha Shillong Parliamentary constituency ki don kiba la jan klet bad don ruh kiba la lynga ka mynsiem haduh ban da poi ka sngi niew vote ha ka 4 tarik Jylliew 2024.
Kane ka jingniew ia ki vote baroh shi india ka sah satang 18 sngi lada khein naduh mynta ka sngi ka 18 tarik mynta u bnai Jymmang 2024.
Ki nongkyrshan jong ki 6 ngut ki kyrtong ki don jingkyrmen beit ba kin ioh ia ka jingjop ban ioh shad ha ka 4 tarik Jylliew 2024 kaba dei ka sngi niewvote ha polo.
Ki paidbah ki la dep thep ia ka vote ha ka 19 tarik iaiong 2024 ki don beit ka jingkyrmen ba u kyrtong jong ki un ioh ia ka jingjop.
Ki nongkyrshan jong ka Voice of the people party ki don jingkyrmen ba u bah ricky syngkon un poi sha ka thong ha kane ka sngi niewvote namar baroh ki paidbah ki la shongshit ha man ki jingialang bad ha social media.
Kumjuh ruh ki nongkyrshan ka NPP kaba dei ka seng kaba bat ia ka bor synshar ia ka sorkar jylla ki don jingkyrmen ba ka kong ampareen lyngdoh kan ioh ia ka jingjop hadien ba la jop bunsien kum ka MLA na Laitumkhrah bad East Shillong constituency.
Ki nongkyrshan ka UDP kaba dei ka seng kaba don ha ka sorkar jylla ki don jingkyrmen ba u bah Robertjune Kharjahrin un ioh ia ka jingjop namar la kyrshan lang da ka seng HSPDP.
Watla ka congress ka don tang 4 ngut ki MLA kaba shong ha ka liang pyrshah ha iingdorbar thawain hynrei ki paidbah ki don jingkyrmen namar ki bun ki vote jar jar ki nion sha ka symbol ka kti kaba la ieng biang da u Bah Vincent Pala.
Kumjuh ruh ki nongkyrshan ki ar ngut ki kyrtong shimet kata u bah Prof.Lakhon Kma bad u bah Peter Shallam ki don jingkyrmen ba kin ioh rah ia ka jingjop haba ki la mih madan ha kane ka ilekshon.