Shillong, Lber 20:Hapdeng ka jingduh jingkyrmen bad syier haba thiah ha ka por mynmiet lada wan ka lyer bad u slap hynrei mynta ka sngi balang, ka Kong Regina Jyrwa bad u bah Kwor Kharsyiemiong ki la ioh ban thiah suk hadien ba ka Khasi Student Union Mawlai cirle ka la pynshna da ka iing dewbilat kaba skhem kaba don saw kamra bad ka painkhana.
Ka kong Regina ka la iathuh ba ka don khun shiphew ngut hynrei ka la hap ban sahlang ha ki lai kamra ha ka iing kaba la ker da ka lyntang bad tap da ka tin.
Ka la iathuh ba ha kane ka iing lyntang ka la sah la kumba 34 snem ha ka jingsiew kaba 250 tyngka shibnai namar ka shu sahwai hynrei hadien ba ka kong Streamlet Kharbhih kam shym la shim shuh ka bai wai bad ai sngewbha ia ka jaka kaba ym duna ia ka ar hajar squar feet kaba la pynshna iing pat da ka KSU Mawlai Circle ha Mawlai nongkwar block-10.
Ka la iathuh ba man ka sngi ka shu leit bylla iing briew ban ap khyllung bad u lok jong ka ruh u bah Kwor Syiemiong u shu bylla ban pyndap bam ia ki khun kiba don 7 ngut ki shynrang bad 3 ngut ki kynthei.