U Bah Lamphrang Kharbani President ka HANM u la ong ba lada ki trai ri trai muluk lane ka Jylla Jylla kim pyndonkam ban kren da ka Ktien Khasi kumno yn khmih lynti ba ka sorkar India kan shimkhia.
Ia kane u Bah Lamphrang u la ong haba kren sha ki lad pathai khubor hadien ka jingwan ïakynduh ia u Lamphang ka ïing dorbar thaw aiñ ka Jylla u Thomas A Sangma mynta ka 14 tarik Rymphang 2024.
Ha kane ka sngi ka HANM hapoh ka jingïalam u President ba rangbah ka seng ki la leit ban buh ruh da ka jingthoh ban kyntu ia u Lamphang ba naduh ka dorbar kaban sdang naduh ka 16 tarik Rymphang 2024 baroh 60 ngut ki MLA kin kren da ka ktien Khasi bad Garo.U Bah Lamphrang Kharbani u la ong ba ki MLA Khasi kin kren da ka ktien Khasi, ki MLA Garo kin kren da ka ktien Garo bad ban buh da ki nong translate.
U Bah Lamphrang u la ong ruh ba ka seng ka la dep ban ïathuh ha u Lamphang ba ka seng HANM kan sa pynjur ki jingïakhih lada ka ktien Khasi bad Garo kam rung ha ka khyrnit ba phra da kaba byrngem ban pynlong syndon da ka jingshah thngan ha Delhi.
Kum ban pynkynmaw hangne ba ka seng HANM ha u 2023 ka la leit ban pynlong jingïakhih ha Nongbah Delhi ban dawa ia ka sorkar pdeng ban pyntreikam noh ia ka ILP, ban pynbeit ia u pud u sam bad ka Jylla Assam bad kumjuh ruh ban ithuh noh ia ka ktien Khasi ha ka khyrnit ba phra jong ka riti synshar ka ri India.