Shillong, Rymphang 06
Ka Delimitation Committee jong ka Khasi Hills Autonomous District Council (KHADC) ban pynbeit thymmai ia ki 29 tylli ki constituency ka la ioh ia ka electoral roll na ka sorkar jylla lyngba ka ophis ka Deputy Commissioner, East khasi hills District haduh 15 tylli ki constituency bad kaba sah mynta kin ap sa ia ka Sohra bad Shella constituency kiba dei ki constituency kiba hap ha East Khasi hills District.
Ia kane ka delimitation committee la khlieh da u Dr. S Kharsyiemlieh uba dei u nongbishar ba la shongthait ka District Council Court kum u Chairman bad bah M. Kharkrang kum u Secretary uba dei ruh u Secretary barim ka KHADC ha kaba mynta kane ka committee ka dang pynlong ka jingbishar bniah ia ki constituency kiba bun briew bad ki constituency kiba duna briew.
Haba iakren bad u Secretary ka Delimitation Committee bah M.kharkrang u la iathuh ba haduh mynta ki dang ioh tang 15 tylli ki electoral roll na ka sorkar jylla na ophis ka DC East Khasi Hills katba ka Sohra bad Shella kim pat ioh.
U la iathuh ba kiwei kiwei ki district kum na Ribhoi, West Khasi hills District, South West Khasi Hills, Eastern West khasi hill ki dang ap haduh mynta.
U la iathuh ba na ki 29 tylli ki constituency ki la ioh 15 tylli, kaba mut ki dang sah sa 14 tylli hynrei kin dang leit ban bishar noh ia kine ki 15 tylli kiba la ioh na East Khasi hills District.
Haba iadei bad ka shnong Mawpat, ka Delimitation Committee kin hap ban shong bishar bha namar mynta ka shnong Mawpat ka kwah ba ka Umsawli kaba dei hapoh ka jingpeit jong u rangbah shnong Mawpat kin hap lang ha ka juh ka constituency.
Namar ka Umsawli kaba hap ha u Rangbah shnong Mawpat ki thep vote ha ilekshon MDC ha Laitumkhrah-Malki katba ka Mawpat ka thep vote ha Mawlai.
La sngewthuh ba ka Delimitation committee kan sa rahlang noh ia ka shnong Mawpat bad ka Umsawli sha Pynthorumkhrah constituency namar ka Mawlai ka dei ka constituency kaba la bun briew tam.
Kumban shu pynkynmaw ka jingthaw ia ka delimitation committee namar ki don ki constituency ki la duna briew palat bad don ki constituency kiba la bun briew palat katba ka jingsam skhim sha ki MDC ka long mar kajuh.