Sha Mawdiangdiang pan jaka na sorkar ban shna ophis thymmai ka KHADC

Shillong, Nohprah 22:

Namar ka jingkhapngiah palat ka sor shillong, ka Executive Committee hapoh jingialam u Bah Pyniaid sing Syiem kum u CEM ka la thoh shithi sha ka sorkar jylla lyngba ka tnad urban ban pan jaka haduh 20 akar ha Mawdiangdiang kaba don hajan ka iingdorbar thawain ka jylla khnang ban tei ia ka ophis ka KHADC kaba thymmai.

Haba jubab ia ka jingkylli ba la wanrah da u bah Teinwell Dkhar, MDC ka UDP na Shella constituency ha ka dorbar tlang kaba la iaid ar sngi, u bah Pyniaid Syiem uba la iathuh ba ka EC ka la dep iakynduh ia u Myntri Rangbah u Conrad Sangma bad ia u symbud myntri rangbah bah Sniawbhalang Dhar uba peit ia ka tnad Urban ban pan jaka kaba heh ban ioh jaka ieng kali bad ka ophis kaba heh ha Mawdiangdiang hynrei ka sorkar ka tyrwa sha Mawpdang kaba ka sorkar ka thmu ban tei ia ka secretariat.

U la iathuh shwa ban pynthikna ia ka jaka, ka EC bad ka sorkar kin la leit jurip lang ban peit ia ki jaka ha Mawdiangdiang bad mawpdang.

U la iathuh ba ka jingkwah ban shna ia ka ophis thymmai ha Mawdiangdiang ka long ban suk haba don marjan bad ka iingdorbar hynrei ban ioh jaka ha Mawpdang ka la kham jngai.

Shuh shuh u la pyntip ba ia kane ka ophis kaba don mynta ha Garikhana kaba don lai akar, ka EC kan sa pyrkhat thymmai noh kum ka jaka khaii pateng ban pynmih pisa ynda la dep tei ia ka ophis ha New Shillong.

U bah Pyniaid u la pyntip ba ka EC ka la pan ei ia ka jaka na ka sorkar bad ynda la ioh ia ka jaka kan sa pynkhreh sa ia ka jingmang pisa ban tei ia ka ophis ka ban biang ki jaka ieng kali.

Ha ka juh ka por u bah Pyniaid u la iathuh ba Executive Committee kan sa tei da ka Council bhavan ha Nongbah Delhi ban suk haba ki paidbah kin ioh jaka sah bad leit donkam jong ka kam ophis kumba kiwei ki district council ki la dep ioh jaka ha Delhi.

Ia kane ka jingthmu ban tei da ka council bhavan ha Delhi la jubab ia ka jingkylli ba la wanrah da u bah Teinwell Dkhar u MDC ka UDP na Shella constituency.

U bah Pyniaid u la iathuh ba ka ophis ka la thoh shithi sha ka Tribal Affair bad u myntri ka sorkar India ban ai ei ka jaka ha nongbah Delhi bad ban bei pisa ban tei ia ka council bhavan.