Bengaluru Nohprah 17- Ka jingiaid ban pyninam ia u soh Ñiamtra, u Sohtrun bad kiwei kiwei de ki marrep na Meghalaya sha Nongbah Bengaluru, ka la nang iaid bha bad ki paidbah ki la nang tuid ban thied ban bam ia kine ki soh. Ka jingpyninam ia ki marrep ka la iaid mynta la 4 sngi lynter, ka ba la sdang naduh ka 14 tarik nohprah 2023, bad mynta ka 17 tarik u Nohprah 2023, ki nong Meghalaya ki la wan ban pyninam khatduh ia ki marrep sa ha ka iew ba heh bah Jong ka Bengaluru ka ba ki khot ka Lalbagh, Botanical Garden, ha kaba da ki spah ngut ki paidbah ki ba la wan ban mad bad thied ia kine soh.
Kum han shupynkymaw hangne ba ia ki marrep la ioh nan pyninam ha ki 3 tylli ki iew bah ha Bengaluru ka jylla Karnataka, bad kita ki long ha phyllaw ki dukan bah ka Lulu Mall, Bangalore, Forum Mall, Kanakpura bad kaba la pynkutynta ka sngi ha Lal Bagh Batonical Garden.
Ha ka jingiakren bad ki lad pathai khubor ha Bangluru, u bah Maqbool Lyngdoh Suiam, Mas Officer on Special Duty u la ong, ba ka thong jong ka sorkar jylla ban pynlong ia kum kine ki jait program, ba la tip kum ka Zestfest Meghalaya Khasi Mandarin, ban wanrah ia une u soh na baroh ki district ki ba don ha poh ka jylla, ban pyni sha ka pyrthei hi baroh kawei ba ka jylla jong ngi ka long shisha ka jylla kaba riewspah .
Ia kane ka program na ka liang ka sorkar ka la thmu ban rah sha Mumbai hynrei dei ka jingkyrkieh palat ki la phah rah noh sha Bengaluruban pyni nam ia ki soh.
U bah Maqbool Lyngdoh u la ong ruh, ba kane ka sngi ka long ka sngi jong ka jingjop bad kadei ruh ka sngi ban pyninam khatduh, ha kaba ki paidbah ki la wan ban mad bad ban thied ruh namar u long u soh u ba bang. Shuh shuh u la iathuh, ba ki paidbah kiba wan ban mad ia kine ki soh na meghalaya kim lah khlem da rah lane thied namar ki ong ba lada ki mad ia une u soh u long u ba bang bad u long pher na kiwei pat ki soh ki ba don sha kylleng ki jylla.
U bah Maqbool u la pyntip, ba ia u soh Ñiamtra na Jylla meghalaya ki rah 4 ton bad 1 ton pat u soh trun bad haduh mynta la ioh ban die bad ai mad ia ki paidbah kumba 70 percent eiei, bad ngim don jingeh shuh ban lah die baroh ia kine ki soh.
“Ka sorkar mynta ka la shimkhia bha, ha kaba iadei bad une u soh Niamtra namar ki tip ba udei u soh u ba la rim bha, bad ha ka area jong ngi total baroh ki don haduh kumba 9 hajar ekar bad ka jingpynmih ka long kumba 40 hajar metric ton, bad bun ki brisoh ki la nangiap nangiap namar ba ki la tymmen, kumta ngi hap ban pynthymmai ia kine ki diengsoh Ñiamtra, bad lyngba jong kane ka Zestfest Meghalaya Khasi Mandarin, ba la pynlong da ka sorkar jylla, kan long ka jingiarap nakabynta ki nongrep jong ngi, bad ba ki paidbah na kiwei pat ki jylla bad na kiwei ki ri ka pyrthei kin tip ba ka jylla jong ngi ka long ka ba riewspah shibun”, la bynrap u bah Maqbool.
Ka sorkar kam kut tang hangne ban pynlong ia kum kine ki program, hynrei kan sa nang pynlong biang ia ki program ban pynianam sa ia kiwei pat ki jait soh kiba dei na ka jylla meghalaya.