Shillong, Nohprah 13
Ka Khun Kynthei ka bri Hynniewtrep ka la kyntu ia ka Khasi Hills Autonomous District Council (KHADC) ba ki dei ban phah khang shwa ia ki dukan bar jylla ki bym don laisen khaii ha iewduh.
Kane ka jingkyntu kane ka seng ka dei namar hadien ba u CEM ka KHADC bah Pyniaid Syiem u la pynpaw ba ki don hapoh ar hajar tylli ki dukan bar jylla ha Iewduh bad na kine ki dukan ki bun ki bym don laisen khaii (trading licence) na khadc.
Haba iakren bad ka General secretary ka Khun Kynthei ka Bri Hynniewtrep ka kong S. Marwein ha ka jingiadonlang ki nongkitkam kiba dei ki nongshong dukan ha Iewduh ka la kyntu ia ki bar jylla ki bym don laisen khaii ki dei ban sangeh shwa ban shong dukan namar kane kan ktah bad pynkhapngiah ia ka Iewduh.
Ka la kyntu ia ka KHADC ba dei ban wad jingtip ia kita ki dukan bym don laisen ban phah khang shisyndon.
“Ngi la ujor sha u CEM ka KHADC ba kum ki longkmie kiba hap kit ia ka khia ka shon ha iing hasem namar lada ngi ki khasi ngi buh jhur ha jaka die madan ngi la shah beh katba u bar jylla u sei ki tiar shabar” ka la ong.
Ka kong Marwein ka la iathuh b aka seng kan kyrshan beit ia ka jingkhynrai laisen ka KHADC ia ki dukan bar jylla khnang ba kiba wan thymmai kin nym mih shuh ki dukan thymmai jong ki bar jylla.
Ka la iathuh ba ha Iewduh ki khasi ki duna kiba shong dukan namar ki bun ki bar jylla namar ki khasi ki bun kiba shong die madan,takadaw ki sngew kum ki poiwir lada iakren ia ka kam khaii ha iewduh.
Ka la iathuh biang ba ki khasi kim lah ban siew lypa ka bai dukan haduh san lak tyngka namar lada siew iakata kim don shuh ban thied sa ia ki mar ki mata nakata ka daw ki bun kiba shong die madan.