U MLA ka North Shillong Constituency u Bah Adelbert Nongrum ha ryngkat u SP ka Traffic Branch ryngkat ki nongïalam shnong ka Mawkhar, Mission, Wahthapbroo bad ki san Dorbar Jaiaw ki la leit ban jurip ïa ka jaka ba ju kyntiew bad pynhiar passanger da ki kali kamai ha Motphran ha ka lad ban leit sha Mawkhar Mission ha syndah ba don ka Syndon Complex bad khmih ïa ki lynti kumno ban weng ïa ka jingdheng kali ha kane ka surok kaba la pynjynjar ïa ki nongleit nongwan.
Haba kren ha kane ka sngi u Bah Adelbert u la ong ba ha kane ka jingjurip na ka liang ki dorbar shnong jong kane ka thaiñ ryngkat bad ki pulit pynïaid kali ki la shim ïa ka rai ban khang noh ban kyntiew bad pynhiar passanger ha kane ka lad namar ka la wanrah ïa ka jingdheng kali kaba shyrkhei ym tang ha Motphran hynrei wat shaduh sha Jaiaw ruh.
Na kaliang U Rangbah Shnong ka Mawkhar u Bah Arwan Tariang u la ong ba ki dorbar shnong ki la rai ruh ryngkat ki pulit pynïaid kali ban khang noh ïa ki taxi ban ïaid lyngba ka Riatsamthiah ban mih ha Mawkhar ha khmat ka ophis ka Hima Mylliem ban ïaid pat sha Motphran hynrei ba kin ïaid beit na Jaiaw lyngba ka Mawkhar ban mih sha Motphran.