Shillong, Nohprah 02 :
Ka Ministry of Home Affairs (MHA) jong ka sorkar India ka la phah ïa ka jubab sha ka seng Hynñiewtrep Achik National Movement halor lai tylli ki mat jingdawa ba ka seng ka la leit buh kata ha kaba ïadei bad ka jingdawa pyntreikam noh ïa ka ILP hapoh ka jylla, ban pynbeit noh ïa u pud u sam hapdeng ka Meghalaya bad Assam bad ban ithuh noh ia ka ktien Khasi hapoh ka khyrnit ba phra jong na riti synshar ka ri India.
U Bah Lamphrang Kharbani President ba Rangbah jong ka seng mynta ka sngi Saitjaiñ, haba kren sha ki lad pathai khubor ha ka ophis treikam jong ka seng kaba don ha Mawkasiang, New Shillong u la ïathuh ba ka MHA ka la phah ia ka jubab ha ka 7 tarik Naiwieng 2023 kata hadien saw sngi ba ka seng ka la leit ban pynlong ka jingïakhih shong kyllaiñ myngngor ha Jantar Mantar ha New Delhi.
U Bah Lamphrang Kharbani u la ïathuh ba ha ka jubab, ka MHA ka la pynpaw ba hap ban pdiang ïa kaba kum katei ka jingdawa ithuh ia ka ktien Khasi ha ka khyrnit ba phra jong ka riti synshar ka ri India.
Ha kaba ïadei pat bad ka ILP u Bah Lamphrang Kharbani u la ïathuh ba ka MHA kam shym la kren shai la kan pyntreikam ne em ïa katei ka aiñ. Katba ha kaba ïadei bad ka jingdawa pynbeit pud, ka MHA ka la jubab ba ïa kane ka kam, la aiti ha ka Central State Division kaba dei khmih ia ka jingpynbeit pud ha baroh kawei ka thaiñ Shatei Lam Mihngi.
U Bah Lamphrang Kharbani u la ai khublei ïa ka MHA kaba la ai ïa kine ki jubab bad kumjuh ruh ïa baroh ki paidbah kiba la ai ka jingkyrshan ïa ka seng HANM ha ka jingpynlong jong ka seng ïa ki jingïakhih kynthup ka jingleit shong kyllaiñ myngngor ha Jantar Mantar ha ka 3 tarik Naiwieng 2023.
Hashuwa ban pynbna paidbah ïa kine ki jubab, ka HANM mynta ka sngi ka la shong ïaa ka executive committee ban pynsngew sha ki nongkitkam bad ban ïaatai iathir halor kiba bun ki kam kiba ïadei bad ka jingshakri ïa ka ri bad ka Jaitbynriew.