Shillong, Naiwieng 15 : Ka kong Ampareen Lyngdoh Myntri jong na tnad ka koit ka khiah ka la ong ba ka jingsiew ba ki ASHA ki ïoh ka la long lypa kaba bit kaba biang, bad ong ruh ba ka long kaba bakla ban ong ba ïa ka pisa ba siew sha ki ASHA la ïoh lut na ka sorkar kmie.
Ïa kane ka Kong Ampareen Lyngdoh ka la ong haba kren sha ki lad pathai khubor mynta ka sngi Balang, haba pynshai ïa ka jingsiew ba ki ASHA ki ïoh bad kumjuh ruh ïa ka kam ba ki trei.
Ka kong Ampareen Lyngdoh ka la ong ba ki don ki ASHA kiba ïoh haduh 31 hajar, 37 hajar ka bai nong kaba long kum ka jing ai sngewbha na ka bynta 6 bnai, bad don ruh kiba ïoh 18 hajar 27 hajar katkum ka kam ba ki trei ban ïarap ïa ka tnad ka koit ka khiah.
Ka Myntri ka la kyntu ïa ki ASHA ba kin ïatreilang bad ka long ba la kloi ban ïakynduh ïa ki ban ïakren halor ka jingdawa jong ki, hynrei ka la kren shai pat ba kan shim pat tang ïa kiei kiei kiba ka tnad ka lah ban leh.
Katkum ka jingong jong ka (Kong Ampareen) la sngewthuh ba ka sorkar kan ym lah ban kyntiew ïa ka jingsiew sha ki ASHA, kiba la pynlong mynta ïa ka jingïakhih ha kylleng ki District ban dawa ïa ka Sorkar ban kyntiew noh ïa ka jingsiew.
Ka Myntri ka la ong ba ki ASHA kidei tang ki nongtrei mon sngewbha bad ki la dep tip lypa ruh ïa ka jinglong jong ka kam hashuwa ba kin rung ban ïarap ïa ka tnad ka koit ka khiah.