Shillong, Naiwieng 13
Ka kynhun jong ki nonghikai hapoh ka skulbah North Eastern Hill University mynta ka sngi ka 13 tarik u naiwieng 2023 ki la sdang ia ka jingiakhih da ka ba sangeh treikam (indefinite strike) ban pyrshah ia ka jingleh jong u vice chancellor ka skulbah NEHU u Prasad Shankar Shukla.
Ha ka jingiakren bad u bah Lakhon Kma u chairman ka Join Action Committee (JAC) u la ong, ba ka jingsdang ban shim rai ia kane ka jingiakhih mynta ka sngi kadei hadien ba u Vice Chancellor jong ka skubah NEHU u Prabha Shankar Shukla um shem la shimkhia ha kaba iadei bad kane ka kam bad u shu ong tang ha ki lad pathai khubor ban iakren hynrei ialade pat u khlem don ha shillong naduh ka 9 tarik haduh mynta.
“Ka jingbym shimkhia jong u Vice Chancellor ia ki mad jingdawa jong ka NEHUTA, NEHUSU, ka pynlong iangi ban iakhih da kaba sangeh treikam naduh mynta ka sngi bad ka jingthep kam jubor ia u wei u bar jylla khlem da pyndep katkum kyndon thungkam” la bynrap u bah Lakhon Kma.
Haba phai pat ha kane ka jingiakhih ka ba la sdang mynta ka sngi u bah Lakhon Kma u la pynpaw ka jingsngewkmen namar baroh ki kynhun ki la ai ka jingiatreilang.
“Ngim lah ban pynduh than ia ka pule puthi jong ki samla pule khamtam mynta ka lah jan sa ka exam hynrei ha kaba iadei bad kane naka liang ka JAC kan sa shong ban iapyrkhat kumno ngin leh ba ngin ioh ia ka jingdawa na u VC ba kan nym ktah than ia ka pule puthi” La ong u bah Lakhon.
Shuh shuh u bah Lakhon u ong ba ka jingdawa jong ngi u Vice Chancellor u dei ban pyndep ha ki por ba biang khamtam eh ka jingdawa ka ba hakhmat eh ban weng kam noh shisyndon ia u wei u bar jylla ba la thungkam khlem don ain khlem don kano ka jingtip.
