Shillong, Naiwieng 10
Ki pulit ha ka sngi palei kata ka 9 tarik Naiwieng 2023 ki la rah ia u Baiateilang Lapang u president ka RBYO sha thanad police outpost na ka bynta ban tohkit ia u halor ka jingioh jingujor da kawei ka Petrol Pump na Byrnihat, kaba la kynnoh ba u la leit ban thep umphiang khlem siew pisa bad ban dawa pisa ruh na kawei ka Petrol Pump kaba don ha Byrnihat.
U Giri Prasad, Superintendent of Police ka Ri Bhoi District u la ong ba ki pulit kim pat kem ia u Bah Baiateilang Lapang, hynrei la shu rah ia u sha thanad, na ka bynta ban tohkit halor ka jingujor da ki briew jong kawei ka Petrol Pump, kaba la kynnoh, ba utei u nongïalam ka RBYO bad u ba dei ruh u chairman ka JAC, u la leit ban thep umphiang khlem siew pisa bad nalorkata u la dawa pisa ruh na katei ka Petrol pump.
U la iathuh ruh, ba dei halor kane ka jingujor ki pulit ki la register mukotdoma katkum ka Nongpoh PS case No. 124(11)2023 U/S 384/506/34 IPC ha thanad Nongpoh bad ki pulit ki la phah da ka 41 A notice.