Nongpoh, 08 Naiwieng:
Ki nongialam ka Ri Bhoi Youth Welfare Organisation (RBYWO), ba la ialam khmat da u Bah Elvis Kyrsian Vice President, u Bah Keny Nongrum u ba dei u General Secretary, mynta ka sngi balang ka 8 tarik u naiwieng 2023 ki la leit ban iakynduh ia u Bah O.T Lyngwa, Joint Director Soil & Water Conservation (Research&Training) conservation Training Institute Byrnihat, ban leit dawa weng mardor ia u Jyoti Das, uba na Nalbari Assam bad uba la shah thungkam hapoh katei ka jaka kum u Muster Roll naduh ka 1 tarik mynta u bnai.
Haba kren sha ki lad pathai khubor, hadien ka jingiakynduh ia u Joint Director u bah Elvis Kyrsian u la ong, ba la thungkam Muster Roll ia utei u briew na Nalbari Assam, ka dei lyngba ka jingbthah ne da ka hukum jong ki bor ba kham halor hapoh ka sorkar jylla.
Haba ïadei bad katei ka jingiohkam Muster Roll da utei u briew na Nalbari Assam hapoh katei ka jaka, na ka liang ka seng kam lah ban pdiang bad kaba la dawa na ki bor bahalor ba ki dei ban weng noh shisyndon, namar ka seng ka sngew ba ia kaba kum katei ka kam, la lah ban leh ne trei da ki samla Khasi bad kiba khlem kam khlem jam, la pynpaw u Bah Elvis Kyrsian.