Shillong, Naiwieng 07
Watla u bah Amazing Kurbah u dei uba la paw ha ka jingtbit jong u ban ialap ilekshon ha Sohiong constituency hynrei mynta pat u la kylla long u tyngshop ha ki phlim khasi bad ia ka phlim kaba u la ak kaba la ai kyrteng Rai-eh ki paidbah kin sa iohi ha ka Khasi National Dorbar Hall Mawkhar, Shillong naduh ka 27 tarik mynta u bnai Naiwieng haduh 2 tarik Nohprah 2023.
Ia kane ka phlim Rai-eh la pynwandur da u bah Kit Rina Nongrum bad u bah Amazing Kurbah u la shah jied ban long kum u Tyngshop bad u Kynsai Lynshiang bad ka Meda Basaiawmoit ka la shim kum ka puron lamkhmat kaba ki paidbah ki tip kum ka Kongbih ha ki serial ba la pyllait ha Youtube channel Kit rina nongrum.
Ka por ban pyn ia ka phlim Rai-eh ka long naduh ka por 11:30 mynstep, 2:00 baje nohphai sngi, 5:00 baje janmiet bad 7 baje janmiet.
Kaba pynshongshit ia ki paidbah ynda la pyllait ha Mawkhar ka long ba u bah Amazing Kurbah u la shim ia ka bynta ban shoh ia ka lok la jong ka Meda.
Haba iakren bad ka Meda Basaiawmoit ka la iathuh ba u bah Amazing u long u briew uba jai jai tangba ha kaphlim Raieh u la shoh ia ka haduh ba kan da sngewsih.
Ka la iathuh ba u bah Amazing u tbit shisha ban ak phlim watla baroh ar ngut ki dei kiba nyngkong ban mih hakhmat ka Camera.
“Ha kaba nyngkong nga la kyiuh ban ak lang bad u bah Amazing namar u dei uba la paw ha ka jingialap ilekshon ha Sohiong hynrei ngam poi pyrkhat ynda ngi la iakynduh u long u briew uba pariah bad ba sngewtynnad bha” ka la ong.
Kumta ka la kyrpad ia ki paidbah ba kin wan ban ai jingkyrshan ia kaphlim Rai-eh ha Mawkhar khnang ban ai mynsiem ia ki nongiashimbynta.
Kumban shu kdew ia ka phlim Rai-eh la dep ioh syrnod na Guwahati bad kane ka phlim la ap lain ha Bijou cinema hynrei namar la sngewthuh bakane ka phlim kan dang slem banpyni namar dang bun kiba la ieng lain lypa kumta u trai jong kane ka phlim u la leit pyni noh shwa tang shi taiew ha Mawkhar.