Shillong, Naiwieng 07
Ka nongpynbha briew ia ki tyngshop ki puron ha ki phlim khasi ka Klurmi Mawrie ka la pynpaw ka jingkyndit ba kan ioh tah ban pynbhabriew ia ka durkhmat u bah Amazing Kurbah u khlur ialap ilekshon haba u la ioh ban ak ia ka music video ka phlim Dhaka Escape kaba la pynmih da ka Chwa Syiemlieh Film Production.
Ka samla Klurmi ka dei kaba sah ha Laitkor kaba dei ruh ka para trai jong ka puron ki phlim Khasi ka Sanmilian Mawrie.
Ka Klurmi ka la pynpaw ka jingkmen haba ka la ioh ban pynbhabriew ia u Phira Dohtdong u tyngshop ba kham paw ha kiphlim khasi, ka Nadia Syiemlieh kapuron, ka Sherilin Khongwar, Rishisha Mynsong bad Joinpil Pde.
“Ngam poi pyrkhat ba u khlur ialap ilekshon un kylla khlur ak phlim haba nga shu iohi ia u bah Amazing tang ha youtube” ka la ong.
Ka la iathuh ba ka pyndonkam bun jait ki jingtah haba pynbhabriew ia u bah Amazing kat haduh ba ka music video kan itynnad haba u shad ha ka phlim Dhaka Escape bad Nadia Syiemlieh.
Ka Klurmi ka don jingkyrmen ba ka phlim Dhaka Escape kan sa itynnad ha cinema ynda la pyllait ia ka music video ha youtube.Ka la iathuh ba ka nang ban pynbhabriew ia kiwei ka dei namar ka la leit shah hikai ia kane ka lain.