U Bah Bajop Pyngrope MDC ka Rambrai Jyrngam mynta ka sngi Thohdieng ka 3 tarik Naiwieng 2023 u la poi lang ha Jantar Mantar kaba ha nongbah Delhi ban ïashim bynta bad ban ai ka jingkyrshan ia ka seng Hynñiewtrep Achik National Movement kaba pynlong ka jingïakhih ban dawa pyntreikam ia ka ILP hapoh ka jylla, ban ithuh noh ka ka ktien Khasi bad ban pynbeit ia u pud u sam bad ka Jylla Assam.
Haba kren ha kane ka sngi, u bah Bajop u la ong ba u la wan ai jingkyrshan kum u dkhot jong ka KHADC, bad kum ka sorkar kmie kam dei shuh ka por ba kan sngap mynthi halor ka jingdawa ban pynrung noh ia ka ktien khasi ha ka khyrnit kaba phra.
U la ong ba lada pynrung noh ia ka ktien khasi ha ka khyrnit ba phra ki khasi kin ioh ban thoh ia ki eksamin bapher bapher ha ka ktien lajong kaban wanrah jingmyntoi ia kiba bun ki samla.