Shillong, Risaw 26
U MLA ka Voice of the People Party (VPP) na Mawryngkneng constituency bah Heavingstone Kharpran u la ong ba ka jingkynnoh u bah Pyniaid Syiem, u MLA barim ka Mawryngkneng constituency bad MDC ba mynta ka Sohryngkham constituency ba ka VPP ka iatreilang bad ka TMC ha ka ilekshon MLA ba dang shu dep ka dei tang ka jingpynthame ia ki paidbah.
U bah Kharpran u la ong kumno u bah Pyniaid un shu kynnoh ba ka VPP ka iatreilang bad ka TMC haba ka TMC ka pynieng la u jong u kyrtong ha ka ilekshon MLA ba dang shu dep.
“Ngim dei ban sngap ia kita ki jingkynnoh namar kim don ki sakhi hynrei kane ka jingkynnoh ka dei tang ban pynthame ia ki paidbah namar ka jingjop jong nga ha ka ilekshon MLA ba dang shu dep ka dei ka jingstad jong ki paidbah” u la ong.
U bah Kharpran u la ong ba ka shap jong ka VPP un dei hi u Prah khasi ym dei u prah West Bengal kumba la kynnoh da u Bah Pyniaid bad u prah Khasi un sa jop biang ha ka ilekshon MDC ha u snem 2024.
Haba kylli kumno ka jingpynkhreh ia ka ilekshon MDC haba ïakhun pyrshah ia u CEM ka KHADC, u bah Kharpran u la ong lada dei ban ïakhun iano iano ym dei ban kheinsting hynrei hap trei shitom ban rah ia ka jingjop.
U la pynkynmaw ba ha ka ilekshon MLA ba dang shu dep u la ïakhun ia u bah Pyniaid Syiem haba u dang dei u MLA ka Mawryngkneng constituency hynrei mynta un ïakhun biang bad u bah Pyniaid Syiem haba u dang dei u MDC bad CEM ka KHADC.
Kumban shu pynkynmaw ha kine ki bnai ba la dep u bah Pyniaid Syiem u CEM ka KHADC u la kynnoh ba ka jingjop u kyrtong ka VPP ha Mawryngkneng constituency ka dei ka jingiatreilang bad ka TMC namar kibun ki nongkyrshan ka TMC ki la leit kyrshan ia ka VPP.
U la ong ba lada dei u prah na West Bengal un nym shan slem bad un sa khylliap lama noh ha ka ilekshon MDC.